Moscow, Iaïong:
Ka Russia ha ka Sngi U Blei ka la pyntip ba ka drone na Ukraine ka la leit kum thombor bakla ia ka shlem Nuclear kaba la hap hapoh ka jingkhmih jong ka Russia. Katei ka Nuclear Power Plant ka dei kaba don hapoh Zaporizhzhia bad kane ka long hadien ba ka tnat International Atomic Energy Agency (IAEA) ka la maham tyngeh ba ym dei ban pynthut ia katei ka shlem pynmih Nuclear namar ka long ka jingma kaba khraw lada jia eiei ia katei ka jaka.
Namar la ong ba katei ka shlem Nuclear kaba heh tam hapoh ka Dew-bah Europe, ka dei kaba la ioh kurup da ki shipai ka Russia naduh kaba sdang jong ka jingleit hiar thma jong ka Russia pyrshah ia ka Ukraine ha u snem 2022.
Kumta, ka tnat iada jong ka Russia ha katei ka sngi ka la pyntip ba ki shipai ka Ukraine ki la leit ban thombor da ki drone ia katei ka Zaporizhzhia Nuclear Power Plant (ZNPP) kaba la hap hapoh ka jingkhmih jong ki shipai ka Russia ha katei ka nongbah. Hynrei haduh kane ka step Sngi Nyngkong ym pat shym la ioh jingtip ba kan don kano- kano ka jingktah ne jingthud ia katei ka shlem Nuclear kaba heh tam. Katba ka Russia ka la kyntu ia ka IAEA ba kan pynrem ia ka Ukraine haba iadei bad katei ka jingleh jong ki shipai jongka ha katei ka jingjia.
