Nongpoh, Ïaïong 08
Ka jingïalap ilekshon katba nang jan ki sngi ban poi sha ka jingthep ‘vote’ ka la nang khluit. Ïa kane la sakhi ha ka janmiet jong ka Lah Sngi U Blei ha kaba ki nongkyrshan jong ka Voice of the People Party (VPP) ki la poi shaduh u pud ban ïashoh-ïadat pyrshah ïa ki nongkyrshan jong ka National People’s Party (NPP) ha ka jingïalang ïalap ilekshon jong ka Kong Ampareen Lyng-doh kaba la pynlong ha ïew Umsning.
Kane ka jingkulmar ka la sdang ha ka por kumba 6 baje eiei janmiet, katba ka Kong Ampareen Lyngdoh, ka kyrtong jong ka NPP ka dang ai jingkren ïalap ilekshon ban pynshai sha ki paidbah halor ka nongrim ba ka la mih shakhmat ban ïakhun ïa kane ka ilekshon bad ruh ban pan ïa ka jingkyrshan.
Dei ha kane ka por ba katba ka Kong Ampareen ka dang ai jingkren, la wan katto-katne ki nongkyrshan jong ka VPP kiba la pyrta ‘Ha u Prah’ bad na ka liang ka Kong Ampareen ruh ka jubab ïa kitei ki nongkyrshan ka VPP ba ka por ka jong ki ka la kut bad ki dei ban leit noh sha la ki ïing ki sem ban lait na kano-kano ka huri-hura.
Tang khyndiat minit hadien katei ka jingkyntu jong ka Kong Ampareen ïa ki nongkyrshan jong ka VPP ba ki dei ban leit noh sha la ki ïing ki sem, ka la mih ruh ka jingïania ktien kaba jur hapdeng ki nongkyrshan jong ka NPP kiba la khluit tar halor katei ka jingwan pynwit jong ki nongkyrshan ka VPP kaba la poi shaduh u pud ban ïasoh-ïadat mar met.
Kane ka huri-hura hapdeng ki nongkyrshan jong ka VPP bad NPP la lah noh ban tehlakam da ka jingshimkhia jong ki pulit ka thanat Umsning. Na ka liang ki pulit ki la rah ruh ïa katto-katne ki briew kiba donkti ha kane ka jingpynkulmar sha thanat Umsning ban pynlong ïa ka jingtohkit.
Kum ban shu kdew hangne, ha kane kajuh ka sngi, lai tylli ki seng saiñ hima ki la pynlong ïa ka jingïalap ilekshon ha ïew Umsning kaba kynthup ïa u kyrtong ka Regional Democratic Alliance kaba la pynlong ha ka por 10 baje mynstep, ka VPP ha ka por 1 baje mynsngi bad ka NPP pat ha ka por 5 baje janmiet.
