Shillong, Ïaïong 08
Ka prokram wad khynnah ïalehkai ba kynsai lane ka Talent Hunt Program kaba hap hapoh ka Khelo India Rising Talent Hunt (KIRTI-MyBharat), ka la sdang ha kane ka nongbah da ka jingwan ïashim bynta kumba 527 ngut ki khynnah na kylleng ki district jong ka Jylla.
Ïa kane ka prokram ka ban kut haduh ka Sngi Balang, la pynlong ha shlem ai jinghikai jong ka Sports Authority India (SAI) Training Centre, Shillong bad ki jingïaleh -kai ki kynthup ïa ka Athletics, Boxing bad ka Football.
Ki khynnah kiba wan ïashim bynta ha ka jingïalehkai Athletic ki don 141 ngut, Boxing ki don 55 ngut bad Football ki don 331 ngut.
Ka jingthmu jong ka tnat ïalehkai jong ka Sorkar Pdeng ka long ban ithuh ïa ki sap ba kyrpang jong ki khynnah bad ban ai jinghikai pura ïa ki lyngba ka jingdon ïa ki jaka ïalehkai kiba paka namar ka jingangnud hi ka long ban sei ïa ki khynnah ïalehkai ki ban paw haduh ki lympung ïalehkai shabar ri kum ka Olympic bad kiwei.
Ha kane ka sngi la sdang da ka jingpynrung kyrteng ïa baroh ki khynnah kiba la wan sha kane ka prokram ha la ki jong ki rta, hadien nangta la bud sa ka jingthew jingkhia, jingthew ïa ka rynïeng, kumjuh kiwei ki jingpeit bniah, nalor ka jingpynmareh, jingkynthih, jingkawang bol da dien (back throw), ki jingïalehkai phutbol, boxing bad athletics.
Haba ïakren bad u nongthoh khubor, u Assistant Director ka SAI, STC, Shillong u T.S Chavhan u la pynpaw ba kane ka prokram ka dei lyngba ka jingshim khia da ka tnat Sports & Youth Affairs jong ka Sorkar Pdeng na ka bynta ban ithuh ïa ki sap ïalehkai ba kyrpang jong ki khynnah khnang ban ai jinghikai ïa ki lyngba ki jaka ïalehkai kiba paka bad ba kin ïoh pat ïa ka lad ban mihkhmat ïa ka ri India ha ki lympung ïalehkai shaba ri.
“Ïa kane ka prokram la pynlong ha kylleng jong ka ri India. Te kumta ki khynnah kiba don ïa ki sap ba kyrpang ha kitei ki jingïalehkai kin shah khot sha ki prokram ai jinghikai ki ban long ha ki shlem ai jinghikai jong ka SAI. Kum ha ka phutbol ka don ka shlem ai jinghikai ha Kerala, Athletics ha Patiala ha ryngkat ka jingdon ïa ki jakai ai jinghikai ba paka bad ki coach ba kynsai.”
Ha kawei pat ka liang ki khynnah kiba la wan sha kane ka prokram, ki la pynpaw ïa ka jingangnud ban ïoh rung hapoh ka shlem ai jinghikai jong ka SAI namar ki thrang eh ban ïoh ka jingshah pyntbit kaba paka lyngba ki coach bad ka jingdon ïa ki jaka ïalehkai ba paka.
