Seoul, Iaïong:
Ka tnat iada jong ka South Korea ha ka Sngi Nyngkong ka la pynbna ba ka jingleit buh kor ‘Satellite’ sha haw-haw ha ka lynti iaid ki met bneng ‘Orbit’ ka la long kaba seisoh hadien ba la pynher ia utei u kor satellite na ka jaka pynher roket jong ka US na SpaceX Falcon 9.
Ka Seoul ka la pyntip ia kane naduh u Nohprah halor ka jingleit buh ia u kor ‘Spy Satellite’ ba nyngkong jongka ha utei u snem ba la lah.
Bad une u kor satellite uba ka la ioh ban leit-buh ha kane ka sien pat u long uba ar jong katei ka ri.
Hynrei ki tnat ba ju pyntreikam ia kitei ki kor satellite ka dang peit-thuh la utei u kor satellite u treikam bha ne em kumba la thmu ban pyntreikam naka bynta ban peit-thuh ia ka jinglong- jingman kylleng sawdong jong katei ka ri.
Kane ka khubor ka long ruh hadien ba ka North Korea ka la lah ban wanrah ia u kor satellite ba nyngkong eh jongka ha u Naiwieng jong u snem 2023.
Hynrei la ong ba ka Seoul ka thmu ban wanrah syndon haduh kumba 5 tylli eiei kitei ki kor satellite ban syntiat bad peit thuh ia ka jinglong- jingman ha kylleng sawdong jong katei ka ri bad da kumno- kumno ka la thmu ban leit buh ia baroh kitei ki kor satellite hapoh jong u snem 2025.
Bad la ong ba tang shu ioh ban leit buh ia baroh 5 tylli kitei ki kor satellite sha haw-haw kumba ka thmu, ka tnat iada jong ka South Korea kan ioh ban peit-thuh bin pa bin ia ka jinglong- jingman ha South Korea bad kumjuh ruh ia ka jinglong- jingman hapoh North Korea ha kaba ka lah ban ioh ia ki dur na kitei ki kor-satellite ha man ka 2 kynta.
Katba, na ka liang jong ka North Korea pat, la ong ba utei u satellite uba ka la dep ban leit buh sha haw-haw ha u snem ba la leit, u la phah ia shibun tylli ki dur bad u la ai jingmyntoi shibun ia ka tnat iada jong ka North Korea khamtam haba iadei bad ka jingioh lad jongka ban peit thuh bad syntiat ia ka jinglong- jingman ha US.
Ka North Korea ka la lah ban pyn seisoh ia katei ka jingleit buh satellite jongka sha haw-haw hadien ki 2 tylli ki sien pyrshang ba khlem seisoh kiba ka la pyrshang ha u Jymmang bad u Nailar jong utei hi u snem 2023.
Hynrei la ong ba ka North Korea ka ioh jingiarap na ka Russia haba iadei bad katei ka jingleit buh satellite jongka sha haw-haw namar ka jinglah jong ka North Korea ban ai jingkyrshan ia ka Russia haba iadei bad ka thma jongka pyrshah ia ka Ukraine da kaba phah ia ki tiar iakhun thma jongka sha Russia.
Ha kajuh ka por la ong ba ka North Korea ha une u snem, ka la pynbna ia ka South Korea kum ka nongshun jong katei ka ri bad kane ka long hadien ba ka South Korea ka la iatreilang bad ka United States ha kiba bun ki liang.
