Shillong, Ïaïong 08
Saw ngut ki rangïalehkai kriket U-19 ka Jylla ki la shah jied ha ka All India Junior Boys Selection Committee (U-19 Boys) jong ka BCCI na ka bynta ban ïadon bynta ha ka prokram kilanmet jong ka U-19 Boys National Cricket Academy (NCA) ka ban sdang naduh 26 tarik mynta u bnai ha kylleng ki bynta jong ka ri.
Kine ki kynthup ïa u Angkit Tamang, Pushkar Raj Singh, Kishlay Vishlux bad u Shavian P. Blah.
Ha lyndet jong kane ka jingshah jied kine ki rangïalehkai ka dei hadien ba ki la lah ban pynpaw ïa ka sap ïalehkai ha ki lympung ïalehkai 2023-24 kiba kynthup ïa ka Vinoo Mankad Trophy (one day) bad ka Cooch Behar Trophy (multi-day). Te kumta ka kynhun ïalehkai ka Jylla ka la ïoh rung sha ka final jong ka Plate Group hadien ba ka la wan ha ka kyrdan ba-ar.
Kumba ka paw ka Cooch Behar Trophy ka la long kawei na ki lympung ba ka Jylla ka la lah ban ïalehkai bha ha ka aïom ïalehkai 2023-24.
U Shavian bad u Angkit ki la long ki nongkawang bol ba kynsai ha kaba ki la lah ban khur 26 bad 25 wiket ha ki hynñiew sien ïakhun, katba u Pushkar u la long u nongtied ba kynsai ha kaba u la lah ban kamai shispah run ha ka semi final. Kumjuh u Kishlay u la lah ban noh synñiang ha ka liang ka ban tied bad kawang bol.
Kat kum ka kyrwoh la ïathuh ba ka jingkilanmet jong u Shavian kan long ha Mohali (Punjab), u Kishlay ha Rajkot (Gujarat), Pushkar ha Salem (Tamil Nadu), katba ïa ka jaka kilanmet jong u Angkit ym pat shym la rai.
Na ka liang ka Meghalaya Cricket Association ka la pynpaw ka jing-sngewsarong bad ka la ai khublei kitbok ba kin nangkiew ha ka kam ïalehkai jong ki.
