Guwahati, ïaïong:
Ha kaba ïadei bad ka jingpyntreikam, ki shipai jong ka tnat Assam Rifles ki la lah ban wanrah jingjop ha kaba ki la lah ban khanglad ïa ki kam pyntriem jong ki kynhun lehnoh ha ka bynta ba shaphang Shatei jong ka ri. Hadien ba la ïoh jingtip shaphang ka jingdon jong ki lehnoh, ka kynhun jong ki shipai ka la pynlong ïa ka jingleit khynra sha ar tylli ki jaka ha kaba ha kane ka jingpyntreikam jong ki, ki la ïoh ban kem ïa ki dkhot jong ka kynhun lehnoh NSCN (National Socialist Council of Nagaland) ha Nagaland bad Arunachal Pradesh.
Ka jingpyntreikam kaba nyngkong ka la long ha Project Colony, Zunheboto, ha kaba ka la don ka jingleit khynra jong ki shipai Assam Rifles ha ka sngi U Blei. Kumba la ïathuh ki heh jong ka kynhun wadbniah, la ong ba ka jingdon jong ki lehnoh NSCN (Niki Sumi) ha kitei ki jaka ka ong halor ka jingthmu jong ki ban leh ïa ki kam pyntriem. Ki shipai ki la ïoh ban kurup ïa ka .32mm pistol.
Ïa une u lehnoh uba la shahkem ha ryngkat ka ktiar siat la aiti sha ki pulit ba dei khmih ha Zunheboto na ka bynta ban pynlong ïa ka jingtohkit. Kumjuh ha kaba ïadei bad kawei pat ka jingpyntreikam kaba la long ha ka thaiñ Kharsang jong ka Changlang District, ki shipai Assam Rifles ki la pynlong ïa ka jingleit thwet ha kaba ki la ïoh ban kem ïa u dkhot ba ïatreilang bad ka kynhun NSCN (K-YA). Na une uba la shahkem la ïoh ban kurup ïa ka.32 pistol ha ryngkat ki kuli ïasiat.
