Shillong, Ïaïong 08
Ka Rangdajied United FC ka la pynliem noh ïa ka Ryntih SC da 4-0 kol na ka bynta ban bat ïa ka kyrdan ba hakhlieh ha ka lympung ïalehkai Shillong Premier League 2023 kaba la long ha ka Lah Sngi U Blei ha SSA Stadium First Ground, Polo.
Kane ka nam jop ka la wan lyngba u Robert Khongjoh (52), Basuk Bina (69), Stephan Pale (73) bad u Enestar Malngiang (90+3) na ka bynta ban pynlong ïa ka Rangdajied ban kamai 9 point na ki lai sien ïakhun.
Hadien ba la lah ban bteng biang ïa kane ka lympung, baroh ar ki kynhun ki la pyrshang ban ïakhun tyngeh naduh kaba sdang, hynrei kim shym la lah ban pynkhih jar haduh kaba kut jong ka kylla step.
Wat la u Robert u la ïoh ïa ka kabu kaba biang ha ka minit kaba 37 hadien ba u rangapkol ka Ryntih u Dipanjan Debnath u la don shabar u laiñ, hynrei ka jingpyrshang ka long lehnohei.
Kham ha shwa ka Ryntih ka la ïoh ïa ka free-kick ha ka minit kaba 27, hynrei u K. Lalrosanga um shym la lah ban thep na ka daw ka jingïakhun tyngeh u rang-apkol ka Rangdajied u Banshanskhem Kharsyntiew.
Hadien ba la bteng ïa ka jingïakhun jong ka kylla miet, u Robert u la lah ban pynurlong na ka bynta ban pynkhih jar ha ka minit kaba 52 ha kaba u Dipanjan um shym la lah ban pyllait na ka jingshah thep.
Une u rangïalehkai u la ïalehkai lang ha ka bynta kaba shakhmat na ka bynta ban pynbuh bol ïa u Basuk, uba la ïoh ban thep kol ha ka minit kaba 69. Hadien 4 minit ka Rangdajied ka la thep biang ïa ka kol kaba lai lyngba u Stephan Pale.
Ha shwa ban wai artad ka Rangdajied ka la thep biang sa shi kol lyngba u Enestar ha ka minit kaba 90+3 na ka bynta ban khur syndon ïa ka jingjop.
Lyngba kane ka jingjop ka Rangdajied ka la tam da 2 point ïa ka Mawlai bad da 3 point ïa ka Shillong Lajong, kiba la don ha ka kyrdan ba-ar bad balai. Katba ka Ryntih ka dangïai sah ha ka kyrdan ba saw bad 4 point na ki saw sien ïakhun.
Ka jingïalehkai ha ka sngi Ba-ar kan long hapdeng ka Shillong Lajong FC pyrshah ïa ka Nongthymmai SC ha ka por 3 baje janmiet.
