Mawkyrwat, Ïaïong 08
Ki paidbah jong ka dong Riwar na san tylli ki shnong kiba kynthup ïa ka shnong Manad, Mawbidong, Pyndenlyngdoh Pynden sohlang bad Lummawbah naduh ki longkmie-longkpa bad ki nongñiah kali ki la rai ban nym leit thep ‘vote’ shuh lada ka sorkar kam lah ban siang rong ïa ka jingsniew palat ka surok.
Kane ka jingbyrngem jong kine ki shnong ka long namar ka jingsngewkhia halor ka jingsniew palat ka surok kaba la wanrah jingeh ïa ka leit ka wan jong ki paidbah khamatam eh ha ka por lyiur. Kumta ha ka 6 tarik u Ïaïong ki la mih shakhmat ban dawa na ki nongmihkhmat ba ki dei pynïoh siang rong noh ïa ka surok Photjaud, Mawbidong kaba don kumba 5 km tam eiei, lem kumta ki paidbah ka dong ka thaiñ kin nym leit thep ‘vote’ shuh.
Haba kren sha ki lad pathai khubor, u Bah Redy Shylla uba dei u President Synjuk Rangbah San Shnong Manad Area, u la ong ba lada ki nongmihkhmat kim sngap ïa ka jingdawa ki paidbah ban siang rong ïa ka surok, u sngew ban ong ba ka la dei sa shisien pat ïa ki paidbah ba kin leh da ka kam namar da kren da ka ktien kin sa pynbieit kai biang ïa u paidbah. Shuh shuh u Bah Redy Shylla u la ong ruh ba lada ka long tang kumne kam myntoi shuh ban jied nongmihkhmat lada kim peit ïa ki jingeh jong ki paidbah. U la ong ruh ba lada kim shimkhia ïa ka jingkyrpad u paidbah kan poi ka por ba kin ym leit thep ‘vote’ shuh shi syndon.
Shuh shuh na ka liang kawei ka longkmie ka la ther tyngeh ïa ka sorkar MDA-2 bad ïa ki nongmihkhmat halor ka jingwan kular jong ki ha ka por ilekshon ban pynbieit ïa ki paidbah hynrei tang shu kut ka ilekshon ki la klet noh bad ka la bynrap ruh kumba phi kular ha ka por ilekshon sngew bha pynurlong ïa ki jingkular.
