Mumbai, ïaïong:
Ka MP jong ka seng BJP ka Pragya Singh Thakur, kaba la shah kynnoh donkti ha ka jingpynbthei bom kaba la jai ha Malegaon ha u snem 2008, mynta kam don ha ka met kaba shait bakhlaiñ bad ki doktor ki la ai jingmut ba ka la donkam ban thiah bad shah sumar shwa, la ong ka kynhun National Investigation Agency (NIA) ha ka kaiphot ba la phah sha ka ïingbishar bakyrpang ha ka lah sngi U Blei.
Hadien ba la khmih bniah halor kane ka kaiphot, u nongbishar bakyrpang jong ka kynhun NIA u AK Lahoti u la pdiang ïa ka jingkyrpad jong ka Thakur ba kan shah map ha kaba leit mih dalade sha ïingbishar ha ka Lah Sngi U Blei. Ka Thakur kaba la shah kynnoh ba ka la long ka snar nongïalam ha kaba ïadei bad jingjia, ka la kyrpad ban shah pyllait ha ka ban leit mih hi dalade namar ka jingshitom bad ka ïingbishar ka la bthah ïa ka kynhun tohkit ba ka la dei ban tohkit bniah halor ki jingshitom jong ka bad ban phah ïa ka kaiphot.
Ka ïingbishar ka la hukum ïa ka Thakur ba ka la dei ban leit mih hi dalade sha ïingbishar ha ka 20 tarik, Ïaïong bad ha kiwei pat ki sngi ban sa wan na ka bynta ban shah tohkit. Ka ïingbishar ka la buh jingthoh halor ki jingphla jong kane kaba la shah kynnoh hapoh ka jingtreikam jong ka kyndon 313 jong ka Criminal Procedure Code (CrPC). Ha kaba ïadei bad ka jingbthei bom, ki la don kumba 6 ngut ki briew kiba la ïap bad palat 100 ngut kiwei pat ki la mynsaw, ïa une u bom uba la bthei la buh ha ka kali arshaka hajan ka jaka mane blei ki Muslim ha Malegaon, ka jaka sor kaba don 200 km na Mumbai ha ka bynta ba shaphang Shatei jong ka Maharashtra, kaba la jia ha ka 29 tarik, Nailur, 2008. Ka kynhun Anti Terror Squad (ATS), Maharashtra ka la tohkit bniah halor kane ka jingjia hashwa ban aiti ïa ka jingtohkit sha ka kynhun NIA ha u snem 2011.
