Shillong, Ïaïong 09
U MLA barim ka Mylliem bad uba dei ruh u General Secretary barim ka Khasi Students’ Union (KSU), Bah Hamlet Dohling, u la pynbna paidbah ba un lum ïa ka jingïalang ha ka 15 tarik u Ïaïong ha Umlyngka ban pyni ïa ka bor hadien ba u Bah Ardent Basaïawmoit kum u President ka VPP u la wan ban ai jingkynthoh ha kajuh ka jaka ha Umlyngka.
Haba leit pan jingkyrshan na ki paidbah ha Mylliem Madan Ïingsyiem ha ka janmiet jong ka 9 tarik Ïaïong 2024 na ka bynta ka kyrtong NPP ka Kong Ampareen Lyngdoh, u Bah Hamlet Dohling u la ong ba don ki nongkyrshan kiba la ong ban sngap beit ïa kane ka jingkynthoh u Bah Ardent hynrei ma u pat un nym sngap namar um kwah ban shah kren jemdaw ha u Bah Ardent.
“U dei uei u Bah Ardent u wan kob ïa ka Mylliem constituency, u la leit ban ïalam bakla ïa ka jaidbynriew hynñiewtrep hynrei lada ki paidbah ki ngop ïa une u briew ka jaidbynriew kan sa jot” u la ong.
U la ong u Bah Ardent u dei uba tieng eit, u wan jingïalang ha Lummawbah u wan kob ban ïatai nia ïa ka MUDA hynrei ha ka 17 tarik Nailur 2015 haba wanrah u Bah Paul Lyngdoh ïa ka jingïakren u mih shabar ka ïingdorbar.
“Hadien ba nga la jop kum u MLA bad long Myntri ha ka sorkar jylla nga la weng ïa ka jingkyntur pud ka MUDA sha ki shnong kiba hap ha Khyrnit Hynriew bad kane keiñ ym dei ban kob da ka ktien hynrei dei ban pyni da ki kam” u la ong.
Ha kane ka janmiet la ïoh jingkren na u Bah Embhah Syiemlieh, MLA barim ka Mawlai, Bah Kansing Lynshïang ha ka jingïadonlang ki nongkyrshan ka NPP.
