Israel, Iaïong:
Ha ka sien nyngkong hadien da ki snem, la ong ba ka Israel ha kane ka por ka la pyntreikam biang ia ka rukom iada na ki namding kaba la ju tip kum ka ‘C-Dome’ ban iada bad tehlakam ia ki ‘namding kiba thmu ban leit thombor ia ka thaiñ Southern jong ka nongbah Eilad ha katei ka sngi.
Ka C-Dome ka long ka bynta jong ka ‘Iron Dome Air Defence System’ ba la pyndonkam da ka Israel ban tehlakam bad pynbthei ia ki ‘namding (Missile) kiba wan poi nalor suiñ khlem da ailad ia kitei ki ‘namding ba kin tyngkhuh ia ka sla khyndew ne ban leit poi sha ki bynta jong ka Israel hynrei kin shu bthei noh tang shiteng suiñ da ka bor jong kitei ki lad jing-iada ba kyrpang ba ka Israel ka pyndonkam.
Ha ka janmiet Sngi Nyngkong, la ong ba ka Israel Defence Force (IDF) ka la pyntip halor ka jingma kaba ap ia katto-katne ki bynta jong ka nongbah Eilat, kaba la shah thmu thombor ha u Rymphang ha ki lehnoh Houthi kiba don na Yemen, bad kiba long ruh ki lehnoh kiba ju ai jingkyrshan ia ki lehnoh Hamas jong ka Palestine.
