Shillong, Ïaïong 09
Ka kynhun ki ‘thei ïalehkai ka Dubakh ‘C’ bad ka Tentation ki la khur ïa ka jingjop ha ka lympung ïalehkai “Maitshaphrang Khasi League Basketball 2024” ba la pynlong da ka Khasi Students’ Union (KSU).
Ha kane ka jingïakhun kaba la long ha ka sngi Ba-ar ha madan ïalehkai basketball jong ka Mawlai Nongpdeng, ka kynhun ki ‘thei ïalehkai ka Dubakh ‘C’ ka la lah ban pynliem noh ïa ka Ball Busters da 51-21 point bad ïa ka nam player of the match la khur da ka G. Wanñiang na ka Dubakh ‘C’.
Ha kawei pat ka jingïakhun, ka Tentation ka la jop da 37-17 point ïa ka Dubakh ‘D’ bad ïa ka nam player of the match la khur da ka L. Kharkongor na ka Tentation.
Haba phai sha ka jingïakhun jong ki shynrang, ka FKJGP ka la jop da 56-42 point ïa ka RI-AR Promoters bad ïa ka nam player of the match la khur da u Stephan Biam na ka FKJGP. Ka Aeronation ka la pynliem noh ïa ka The Underdog da 56-41 point bad ïa ka nam player of the match la khur da u Bashemphang Kharnaior na ka Aeronation.
Ka KSU Mawprem ka la jop da da 33-21 point ïa ka Black Diamond bad ïa ka nam player of the match la khur da u Kevin Shabong na ka KSU Mawprem. Ka Ïaineh ‘A’ ka la pynliem noh ïa ka Eagle Elite da 48-31 point bad ïa ka nam player of the match la khur da u Valentino Umdor na ka Ïaineh.
