Shillong, Ïaïong 09
Ka khlur mareh marathon ka Jylla, ka Glorify Kurbah ka la khur ïa ka jingjop ha ka jingïakop mareh jong ka Guwahati Half Marathon kaba la long myn ha ka sngi U Blei ha Karmabir Nabin Chandra Bordoloi Stadium, Sarusajai kaba ha Guwahati.
Ha kane ka jingïakop ba la pynïaid da ka IIT Guwahati, la wan ïashim bynta kumba 4000 ngut ki nongïalehkai kaba la phiah ha ki ar bynta ki jingïakop kata ka ‘Spirit Run’ kaba 6 kilometre bad ka ‘Glory Run’ kaba 21km.
Kumta ka Glorify ka la ïashim bynta ha ka Spirit Run’s jong ki kynthei ha kaba ka la lah ban khur ïa ka jingjop, katba ïa ka kyrdan ba-ar bad balai la jop da ka Sangita Bordoloi bad ka Padmini Das. Ha ka liang ki shynrang la jop da u Nitish Kumar, Sandeep Yadav bad u Dinesh Kumar kiba la wan ha ka kyrdan ba nyngkong, ba-ar bad balai.
Haba ïakren bad u nongthoh khubor, ka Glorify ka la pynpaw ka jingsngewkmen halor kane ka jinglah ban kynjoh sha ka thong. “Hadien ba nga la wanphai na ka North East Games kaba la long ha Nagaland, nga la ngat ha ka jingmynsaw, hynrei nga sngewkmen pat ba la lah ban ïalehkai bha pyrshah ïa ki nongïa-lehkai kiba kynsai kiba ba kiwei pat ki jylla.”
Wat la na ka liang ki bor pynïaid kim shym la lah ban pynpaw ïa ka por halor ka jinglah ban pyndep ki nongïalehkai, hynrei kat kum ka jingbuh rekod hi da katei ka nongïalehkai ka la lah ban pyndep ha ki 22 minit.
Kumta kane ka khlur ïalehkai kan pynkhreh sa ïa kawei pat jingïakop jong ka U-23 National Athletics Competition ka ban long ha u Risaw mynta u snem ha Kolkata.
Haba phai sha ka Glory Run ha ka liang ki shynrang la jop da u Chandan Yadav, Pawan Singh bad u Bijay Deka, kiba la wan ha ka kyrdan ba nyngkong, ba-ar bad balai. Ha ka liang ki kynthei la jop da ka Syamali Singh kaba la kham hashwa ïa ka Rinky Kumari Chauhan bad ka Anita Das.
