Shillong, Ïaïong:
U nongïalam ka National People’s Party (NPP), Bah Pynïaid Sing Syiem uba dei ruh u Chief Executive Member (CEM) ka KHADC, u la ong ba ka jingïakhih ïa ka mat MUDA ha u snem 2015, ka dei tang ka jingleh ‘drama’ hapdeng u Dr Mukul Sangma uba long u Myntri Rangbah ha kito ki por bad u Bah Ardent M Basaïawmoit.
U Bah Pynïaid u la kren ïa kane ha ka jingïalang ïalap ilekshon na ka bynta ka Kong Ampareen Lyngdoh kaba la long ha ka Lah Sngi U Blei ha ïew Umsning bad ha kaba u la ong, ba ym dei tang ka VPP kaba ieid jaidbynriew, ha kaba kat kaba ki ïakhih ka long tang shiteng lynti bad iehnoh ïa ka jingïakhih.
Une u nongïalam ka NPP u la ong, “Ka jingïakhih ïa ka mat MUDA ha u snem 2015, ka long beit tang ka ‘drama’ namar ngi tip ba u Bah Ardent u dei u paralok ba jan bha bad u Mukul bad ngi tip ruh hadien ba kane ka jingïakhih ka dei tang ka ‘drama’ hapdeng u Dr Mukul bad u Bah Ardent. Balei yn dang pynbiej biang ïa u paidbah, lada dang biej ha kane ka kynti shano shuh ka ri bad ka jaidbynriew kan poi.”
Shuh shuh u Bah Pynïaid u la ong, sngewsih ba ïa ka mat MUDA ha ka por ba dei ban ïatai hapoh ka ïingdorbar kata ha ka 19 tarik u Nailur, 2015, hynrei ka mih ka khubor ba jah klep u Bah Ardent na ïingdorbar por ba ïakren MUDA, kum ki paidbah ki dei ban bishar bad rai hi halor kane.
