Shillong, Ïaïong 09
Ka Regional Democratic Alliance (RDA) ha ka Sngi Ba-ar ka la pyllait paidbah ïa ki mat treikam jong ka kynhun na bynta kane ka ilekshon ban wan sha ka Lok Sabha.
Ïa kitei ki mat treikam jong ka RDA la pyllait da u Chairman, Bah Metbah Lyngdoh, ha ryngkat ka jingdonlang u Working President ka UDP bad Myntri Sorkar Jylla, Bah Paul Lyngdoh, General Secretary, Dr. Jemino Mawthoh nalor kiwei-kiwei ki nongïalam jong ka seng.
Kitei ki mat treikam ki kynthup ïa ka jingpynkupbor ïa ki Autonomous District Council (ADC) ha kaba ka kynhun ka la kdew ban pynkhlaiñ shuh-shuh ïa ki District Council, donkam ban wanrah jingkylla ha ka Khyrnit ba 6 jong ka Riti Synshar ka Ri lyngba ka jingpynkhlaiñ ïa ka Para 3, da kaba pynkylla ïa ka Para 12 A ka ban kdew shai ba ki aiñ jong ka Sorkar Pdeng bad ka Sorkar Jylla, haba ïadei bad ki riti dustur, ki rukom ïoh bad ai pateng, ka khyndew ka shyiap, ka rukom synshar trai-ri bad kumta ter-ter kin ym treikam ha ki jaka jong ki ‘riewlum trai-ri da kaba bsuh ïa ka kyntien ‘Governor’ ha ka jaka ka kyntien ‘President’ ha ka Para 12 A (b) jong ka Riti Synshar ka Ri.
Haba phai sha ka mat halor ka ïoh kam ïoh jam, ka kynhun ka la kular ban shimkhia ïa ka jingpyntreikam ka polisi bhah kam kaba 44% na bynta ki kam ha ka Group C & D ha ki ophis bad jaka treikam ka Sorkar Pdeng, kumjuh ka jingbhah kam kaba 100 na ka 100 ïa ki trai-ri trai-muluk na bynta ki kam kontrak ha ki shlem treikam Sorkar bad ka bhah thung kam ha ki jaka trei ki ‘riew shimet ne kompeni shimet.
Ha kajuh ka por, halor ka jingrung kyrthep ki mynder ri, ka RDA ka la kdew ba kum shi bynta ban tehlakam ïa ka jingrung kyrthep ki mynder, ka kynhun baroh kawei kynthup ïa u kyrtong MP, Bah Robertjune Kharjahrin kan ïai buddien ban pynbor ïa ka Sorkar India ba kan pyntreikam ïa ka Inner Line Permit (ILP) ha ka Jylla.
Haba ïadei bad ka jingkyntiew ïa ka ktien Khasi bad Garo, ka kynhun ka la kular ban buddien halor ka jingpynrung ïa ka ktien Khasi bad Garo ha ka Khyrnit ba 8 jong ka Riti Synshar ka Ri India, nalor ban pyrshang ruh ban pynlong ïa kine ki ktien ban pyndonkam ha ka ban thoh ïa ki eksamin na bynta ki kam ha ki ophis Sorkar Pdeng kiba don tnad treikam hapoh ka Jylla.
Halor ka mat ba ïadei bad u pud u sam, nalor ka jingban jur ïa ka jingdonkam kyrkieh ban khmih bniah ïa ka jingïakut halor ki kam khappud hapdeng ka India bad Bangladesh, ka RDA kan shimkhia ruh ban ïakren bad ka Sorkar India ban pynbeit noh ïa u pud u sam hapdeng ka Meghalaya bad Assam – ka ban ïadei dur bad ka Khyrnit ba 6 jong ka Riti Synshar ka Ri.
Na ka liang ka RDA ka la kynthup ruh ïa ka mat halor ka shongsuk-shongsaiñ ha kaba ka la kdew ïa ka jingdonkam ban plie lynti ïa ka jingïakren ïasuk hapdeng ka Sorkar bad ka kynhun kieng atiar – HNLC ne kiwei-kiwei ki kynhun lehnoh ka Jylla.
Ka RDA kan shimkhia ruh ban pyrshah ïa ka jingpyntreikam ïa ka Uniform Civil Code (UCC), ka jingpyrshah ban khlong ïa u marpoh khyndew – Uranium, kumjuh ban pynsngew sha ka Sorkar India kan ym pyntreikam ïa ka Citizenship Amendment Act (CAA) ha baroh shi lynter u pud u sam jong ka Jylla nalor ka jingpyrshah halor kano-kano ka jingpyrshang ban pynbor ïa ki mat bapher-bapher.
Shuh shuh ki mat treikam ka RDA ha kane ka ilekshon MP ki kynthup ruh ïa ka jingpynkup bor ïa ki samla, pule-puthi, ka jingkyntiew ïa ki nongrep bad ka rep ka riang, ka jingkyntiew ïa ki ‘riewlum trai-ri, ka roi ka kiew jong ki niam tynrai, ki ‘riewshlur ïaleh laitluid ka ri, ki kam korbar ri, ‘Civil Service’, ka synshar-khaddar kaba khuid, ka India kum ka ‘Welfare State’, ka hok kiba duna dkhot met, ka koit ka khiah, ka hok halor ka khyndew ka shyiap bad ki mar pohkhyndew bad ka jingkyntiew ïa ki kynthei.
