Shillong, Ïaïong 09
U Chief Executive Member (CEM) ka KHADC, Bah Pynïaid Sing Syiem, u la ong ba katkum ka jingkren jong ka Voice of the People Party(VPP) ha ka 8 tarik u Ïaïong 2024 ha ka por shiteng sngi ha ka jingïalang ïalap ilekshon kaba la pynlong ha Umsning, Ribhoi District ha kaba ki la pynpaw ba kin sa ujor pyrshah ïa u sha ka Election Commission ka India (ECI) halor ka jingkynnoh jong u ba ki nongkyrshan ka VPP ki donkti ban pynkulmar ha ki jingïalang ïalap ilekshon jong ka NPP ka long ka bym lah ban pynshong nongrim bad ka bym lah ban pdiang satia.
Kum ban shu kdew hangne, na ka liang ka VPP ha ka Sngi Ba-ar ka 9 tarik u Ïaïong 2024, ka la phah da ka jingujor sha u CEO ka jylla, u Dr. B.D.R Tiwari pyrshah ïa u Bah Pynïaid Sing Syiem halor ka jingkynnoh jong u ba ka VPP ka la phah khnang ïa ki nongkyrshan jong ka ban wan pyrta “Prah” ha ka sngi ba pynlong jingïalang ka seng NPP ha Ïew Umsning.
Na ka liang ka VPP ka la ong ba ka jingkynnoh jong u Bah Pynïaid ïa ka seng ka dei ha ka 6 tarik u Ïaïong 2024 ha ka jingïalang kaba la long ha Rynjah bad ha ka 8 tarik u Ïaïong 2024 ha ka jingïalang kaba la long ha Umsning. Ka seng VPP ka la ujor ruh ha kaba ïadei bad jingktah kti ki paidbah kiba lah don ha ka jingïalang jong ka NPP ha Umsning pyrshah ïa katto-katne tang namar ba ki ïa pyrta ïa ka shap jong ka VPP.
Haba kren sha ki lad pathai ha ka Sngi Ba-ar, u Bah Pynïaid u la ong ba kam lei-lei lada ka VPP ka kwah ban ujor sha u CEO hynrei kam lah pat ban pynshong nongrim ïa kiei-kiei namar ba ha ka por mynmiet pat jong ka 8 tarik u bnai Ïaïong 2024, la ïoh ban ring dur ïa ki nongpynkulmar katba ka jingïalang ïalap ilekshon jong ka NPP ka dang ïaid shakhmat.
“Kane ka long ka bym lah ban pdiang ïa kata ka jingujor jong ki, lada ki kwah ban ujor ruh ym lei-lei, lehse ka Election of Commission kan pdiang hynrei kin nym lah pat ban pynshong nongrim namarba la ïoh ban ring da ki dur khih ïa kine ki nongpynkulmar”, la bynrap u Bah Pynïaid.
Shuh shuh u Bah Pynïaid u la ong ba man ka por ba ju pynlong ïa ki jingïalang ïalap ilekshon jong kiwei pat ki seng saiñ pyrthei, la kyntu ïa ki nongkyrshan lajong ba kin long kiba donakor hynrei ka jingjia kaba la jia pat ha ka janmiet jong ka 8 tarik u Ïaïong 2024, ka la pynpaw pyrthei mano ba sdang ban kynshoit bad pynshit ïa ki briew lajong.
“Lada ka long ka Congress ne ka UDP ne ki kyrtong shimet, ngi burom markylliang da kaba ngi kyntu ïa ki briew nongkyrshan lajong ba kin long kiba jai-jai hynrei kaba sngewsih ka long ba kum ka Jaitbynriew Khasi bad kum ka Ri kaba tipbriew-tipblei, ka Ri donakor-donburom, mynnin ka la pawshai ba mano kiba la sdang ban kynshoit ïa ki briew jong ki ban pynkulmar bad pynthut ha ki jingïalang jong ngi”, la ong u Bah Pynïaid.
U Bah Pynïaid u la ïathuh ruh ba ka jingpynthut jong ki nongkyrshan ka VPP ïa ka jingïalang kam dei tang ïa ka seng NPP, hynrei ka dei wat ïa ka seng UDP ruh kaba la pynlong ïa ka jingïalang ha ka por mynsngi.
