Jowai, Ïaïong 09
U MLA jong ka Jowai, Bah Wailadmiki Shylla uba dei ruh u Working President jong ka NPP Meghalaya, u la ong ba u la jop ïa ka ilekshon da ka jingieid jong ki paidbah ym da ka bor jong ka pisa.
Ïa kane, u MLA ka Jowai u la ong hadien ka jingkynnoh jong u President ka VPP u Bah Ardent M Basaïawmoit ba ki nong Jaiñtia ki jied nongmihkhmat da ka jingthong pisa.
“Ha Jowai ngam ïoh ban ai pisa ïa ki paidbah, ki kyrshan ïa nga da ka jingieid bad ha ka por ba nga ïakhun ïa ka ilekshon, dei ki paidbah kiba ïarap ban pynpoi khaw, pathaw, dai, shini bad dieng sha ïing jong nga,” la ong u Bah Wailadmiki bad bynrap ba katei ka jingkynnoh u Bah Ardent ka pynbudnam bad pynhiar dor ïa ka rilum Jaiñtia.
Haba phai sha ka jingkiew jong ka NPP, u Bah Wailadmiki u la ong, ka NPP ka la jop 26 ngut ki MLA ha ka ilekshon MLA ha u snem 2023 bad 2 ngut ki MLA jong ka PDF ki la pynïasoh ïalade bad ka NPP bad mynta ki don 28 ngut ki MLA.
U la ïathuh lypa ba ha ka ilekshon 2028, ka NPP kan jop bun tylli ki ‘seat’ bad kan thaw sorkar marwei.
Halor ka Reservation Policy, u MLA ka Jowai u la batai ba na ka daw jong u Bah Ardent, ki samla Khasi Jaiñtia kiba wad kam wad jam ki la duhnong namar shwa ban tuklar u Bah Ardent ki samla Khasi Jaiñtia ki ïoh tam na ka bhah jong kiwei nalor ka bhah ba la mang ïa ki, hynrei mynta na ka daw jong u Bah Ardent ki la duhnong noh.
Kiwei kiba la ai jingkren ki kynthup ïa u Bah Habahun Dkhar bad Bah Aiborlang Shadap MDC-JHADC kumjuh u Bah Nehemayah Tyngkan, Lasting Suchiang nalor kiwei-kiwei ki la kyntu ïa ki nongshong ïew kumjuh ïa ki nongleit-nongwan ïew ban kyrshan bad pynjop donburom ïa ka Kong Ampareen Lyngdoh ha kane kynti khnang ba kan mihkhmat na ka bynta ka jingangnud jong ki paidbah jong ka Shillong Parliamentary Constituency.
