New Delhi, ïaïong:
Ha ka dorbar kaba dang pynlong shen jong ka Delhi Assembly, ki MLA jong ka seng AAP ki la pynpaw ka jingsngewkhia haba ki la ïoh jingtip ba ka seng BJP ka la thmu ban pyntreikam da ka President’s Rule ne ka jingsynshar President ha ka nongbah Delhi hadien ka jingshahkem jong u Myntri Rangbah u Arvind Kejriwal.
U Madan Lal, uba long u MLA jong ka seng AAP na Kasturba Nagar, u la buh ka jingkynnoh ha ka por ba don ka dorbar, ha kaba u la ong ba kine baroh ki la pynbor ïa u Kejriwal ba hadien ka jingshahkem ba un hiar shuki.
Kumba la paw hashwa, la ong ba u Lieutenant Governor jong ka Delhi u VK Saxena u la pynpaw ba u sngew artatien ban ai jingbit ïa u Kejriwal ba un treikam bad synshar na patok.
Kane baroh ka la wanrah ka jingïatai nia ha kaba ïadei bad ki rukom treikam kiba long aiñ bad halor ka hok katkum ka Riti synshar haba phai sha u Myntri Rangbah ba un synshar ha kane ka por ba u don ha patok.
U Arvind Kejriwal u la shahkem ha ka 21 tarik, Lber ha ka Enforcement Directorate (ED) ha kaba ïadei bad ka jingshah kynnoh donkti ha ka jingkamai ïa ka spah bymhok kaba la mih na ka kam bamsap halor ki jingpyndkoh treikam hapoh ka tnat Excise ha kaba kane ka la pynlong ïa ka ïingbishar ban rai set patok ïa u haduh ka 15 tarik, Ïaïong.
Hapdeng kane ka por, ki MLA jong ka seng AAP ki la ïeng tylli lang ban ai ka jingkyrshan ïa u Kejriwal, ha kaba ki la ïai ban da kaba ong ba kam shym don kano-kano ka aiñ ban khanglad ïa u ban ïalam ïa ka sorkar katba u dang don ha patok.
