Mumbai, ïaïong:
Ka tnat shipai suiñ (IAF) kan sa pynbiang san tylli ki M 17 V5 Helicopter na Raipur bad Nagpur na ka bynta ban ai jingkyrshan halor ki rukom pyntreikam ha kaba ïadei bad ka ilekshon ha Gadchiroli bad ha kiwei pat ki bynta jong ka ri.
Ki bor pynïaid distrik jong ka Gadchiroli ki la buh ka jingkyrpad na ka bynta ban pynbiang san tylli ki liengsuiñ jong ki shipai Indian Air Force (IAF) kum shi bynta ban pyntikna ban pynïaid beit ïaid ryntih ïa ka Lok Sabha ka ban long ha ka 19 tarik, Ïaïong, naba kane ka thaiñ ka ju ïakynduh jingeh na ki jingbyrngem jong ki lehnoh Maoist.
Kumba la mang la ong ba lah buh ryntih ban pynbiang kawei ne ar tylli ki helicopter na ka bynta ki jingpyntreikam kiba ïadei bad ka ilekshon.
Ka rai halor ka jingpyntreikam shuh shuh ïa ki helicopter ka la long naba ki seng saiñ pyrthei ki sheptieng ïohba don kiba shah thombor ha ka lynti ban leit sha ki jaka thep vote.
Katkum ka jingïathuh jong u Collector ka Gadchiroli u Sanjay Daine, u la ong ba kin sa don 205 tylli ki kynhun treikam halor ki jingthep vote ki ban sa shah wan buh da ki helicopter na ki lai tylli ki jaka kiba kynthup ïa ka Gadchiroli, Aheri, bad Wadse.
Ki heh ba dei khmih ki la shna ïa ki jaka hiar ryngkew jong ki helicopter ha kiba bun ki jaka bad la ai jaka ha ki katto katne ki jaka rep na ka bynta ka jaka hiar jong kine ki liengsuiñ.
Hadien ba la dep ka jingthep vote, ïa kine ki kynhun ba shah pyntreikam na ka bynta ka ilekshon yn sa kit biang ha ka 20 bad 21 tarik, Ïaïong, ha kaba ki shipai IAF kumba la pynbeit, kin sa mih na Gadchiroli ha ka 22 tarik, Ïaïong.
