Agartala, ïaïong:
U Myntri Rangbah jong ka Tripura u Manik Saha, dang shen u la pynbna ïa ka song tyngka kaba T. 100 klur ba la mang da ka sorkar kmie na ka bynta ki lehnoh kiba la leit pyndem jong ka kynhun Nationalist Liberation Front of Tripura (NLFT). Ka kynhun lehnoh NLFT, kaba la shah ñiew beaiñ ha ka sorkar, kumba la ïoh jingtip la ong ba ka la treikam na ki ktem kiba don ha ki thaiñ ri lum jong ka Bangladesh.
Kane ka song tyngka ka long shi bynta jong ka Special Economic Development Package ne na ka bynta ki trai shnong jong ka Tripura bad kaba don jingthmu ban ai jingkyrshan na ka bynta ki dkhot jong ka kynhun NLFT kiba la don bynta ha kiba bun ki kam thombor kiba thmu ban phai sha ka jingim kaba thymmai.
U Saha u la pynsngew ïa kane ka jingpynbna ha ka jingïalang kaba la long ha Gabordi, West Tripura distrik, ha ka por ba u la don bynta ban ïalap ilekshon na ka bynta u kyrtong ban ïakhun ha ka ilekshon Lok Sabha u Biplab Kumar Deb. U Myntri Rangbah u la ai ka jingïaroh ïa u Myntri Rangbahduh u Narendra Modi na ka bynta ka jingweng jong u ïa ki jingeh hapoh ka jylla, da kaba soi ïa ki 12 tylli ki dorkhas ba ïadei halor ka jingthmu ban wanrah ka jingsuk ha ka thaiñ North East naduh u snem 2014.
