Shillong, Ïaïong 09
U Chairman ka Regional Democratic Alliance (RDA), Bah Metbah Lyngdoh, u la ong ba um don por ban peit ïa kiwei pat ki seng saiñ pyrthei hynrei ka jingpynleit jingmut jong u ka long beit thik tang ïa ka kynhun lajong (RDA).
“Nga pynleit jingmut tang ïa ka RDA, kane ka dei kaba hakhmat eh. Ngan ym pynlut por ban peit ïa kiwei pat ki seng saiñ pyrthei ki leh aïu,” la ong u Bah Lyngdoh haba jubab halor ka jingnang kiew jong ka Voice of the People Party (VPP) khamtam ha ki jaka nongkyndong jong ka Jylla.
U la ong ruh ba kumba ka long mynta, ka kynhun ka biang ha ki shnong ki thaw bad ki paidbah ki khmih lynti ïa ka RDA ban kner sha man la ki jaka kyndong ba hap hapoh ka Shillong Parliamentary konstitwensi, bad kum ka kynhun ka ïaid shakhmat bad kane.
Haba kylli, u la ong, “Ai ba ki paidbah kin rai, ngam don ban ong eiei. Na bynta jong ngi, ngin ïaid katkum ki mat treikam bad ngin pynshai sha ki paidbah halor kine ki mat. Halor ka jingbym pynïeng kyrtong ka BJP…ngam don eiei ban ong haba ïadei bad kiwei ki seng, hynrei kaei kaba kham khraw ïa nga kaba nga dei ban leh, ka long ban peit shuwa ïa ka RDA bad u kyrtong jong ka.”
Shuh shuh u la ong ba ïa mynta, ka RDA ka leit sha ki paidbah ban pynsngew ïa ki mat bad haba ïalap ilekshon ruh ka kham pynlut por ban batai bad pynshai sha ki paidbah haba ïadei bad kine ki mat kiba la sahteng da ki phew tylli ki snem.
“Ngi sngew ba la donkam ban pynthymmai ïa u nongmihkhmat ha Delhi bad ngi sngew ba u kyrtong jong ngi u long uba biang bad uba dei,” u la ong.
Halor ka jingjia kaba la jia ha Umsning, Ri-Bhoi ha ka miet Lah Sngi U Blei, u Bah Metbah u la bynrap, “Ngam don jingtip kumno kane ka la sdang bad kan ym ïahap ïa nga ban ong eiei. Hynrei ha ka por ilekshon, baroh ki seng saiñ pyrthei ki don ïa ka hok ban ïalap na bynta u/ka kyrtong lajong bad kumta dei ban ai sha ki ka hok, la u dei u/ka kyrtong ne mano-mano kiba ïalap na bynta jong ki…ka rynsan kaba ki lah ban pynpaw kano-kano kaba ki kwah kren sha u paidbah na bynta u kyrtong lajong.”
