Raphael Warjri
Ka rukom dud sabuit ka long ba kita ki briew ba tbit ban dud sabuit ki shim ka shun na ka dabia ne tyndong shun bad ki jyrthiaw kyllaiñ ha ki shympriah kti da kaba thnum artat ban beh ksuid ïa kata ka sabuit ba pynpang pynjhia ïa ki briew. Kata ka ktien thnum ka long kumba ïasaid ban law ban loit ïa ka sabuit sakai na ki nongpang, bad teng teng lada dei kaba ngat ha ka sabuit sakai ba khlaiñ bor, kata ka sabuit ka ju leit rung ha kita ki nongsabuit. Bunsien ki nongsabuit ki ju jyreh lane ksem da ka jingsma kum kata kaba ngat sabuit. ïa kata ka jingsma na kaba ngat sabuit la ju tip kum ka sma sapoh, namar ba ka syriem ka jingsma iwtung kum ka sapoh ba mih na ka jyndem ba pdem kyiad. Haba dei hi ka sabuit kiba ngat ki ju lynga, pdu, jyreh bad ksem da kaba sma iwtung kaba lah ban sngewthuh shai ba dei na kaba shah ai sabuit ha ki briew lane ba jia ryngkhat na kaba peit shin mano mano kiba don sabuit. Nalor kaba ktah na ka bam ka ju don ruh ka sabuit ba kita kiba don sabuit ki ïaroh ïa ka dur bhabriew jong ki khyllung khlem dei lyngba ka bam ruh ki lah ban ngat sabuit. Kiba don sabuit ki lah ban long kiba thmu khnang ban aisniew lane ka lah ban jia ryngkhat na ki briew ba khlem thmu ha ba ki don sabuit ha lade. Kumta ki trai khun jong kita ki khyllung barabor ki ju kynphuit haba don mano mano ba iaroh ïa ki khyllung, ym dei ba suba sniew ïano ïano, hynrei ban ïada na ka bor jong ka sabuit kaba lah ban hap shop ha ki khyllung. Wat lada ym don kum kata ka rukom ha kiwei kiwei ki jaitbynriew, hynrei ka ktien phareng ba kham jan ka dei ‘Anathemise’ ne ‘Accurse’ kaba syriem jingmut kum ka sabuit sakai. Haba pdu ne jyreh ha ka ktien phareng ka dei ‘Belch’ bad kaba ksem pat dei ‘Flatus’ lane ka tien synlar ba tohmet ka dei ‘Fart’. Kane ka rukom ban beh krad ïa ka jingsniew kaba hap shop ha ka met briew ka don bun rukom ba tang da ki riew rangbah ne riew tymmen kiba tbit bad don sap ruh ka la biang ban law ban loit. Hynrei ki don ki kam leh sniew kiba donkam da ki nongswar nongïasaid kiba da tbit thikna ha la ka kam bad kiba la mlien barabor lyngba ki ryta. Kaba kham shaniah bad sngew skhem ha ki paidbah ka dei ïa ki kynja Syiem kiba law ba loit ban pynkhiah na kaba shah khap thlen.
Katkum ka jingngeit Khasi ka don ka khanatang ba ki Syiem, khamtam ki syiemblei ki dei kiba la pynkup bor da ka Meihukum ban long kiba lum ba lang ïa ka nap ka bili ban khur khyrdong ïa baroh ki jyrsieh ha ka imlang sahlang ban pynkhuid na ka lyngwiar jong ka longbriew manbriew. Ka don ka saiñpyrkhat ba jylliew haba la aiti ha ka iktiar jong ki syiemblei ban sait pynkhuid, ban law ban loit ïa baroh plaiñ ki syrdoh ki sohkyrdot jong ka pang ka jhia, ka kyrdit ka shempap lane kino kino ki shitom shipa ha ka longïing longsem, ka imlang shalang. Katkum ki khanatang ki syiemblei ha Ri Khasi ki dei kiba hiar pateng na ka Pahsyntiew jong ka Hima Shyllong, kiba hiar pateng na ka Li Dohkha jong ka Hima Sutnga, hynrei na ka Saia Nongum jong ka Hima Madur Maskut khlem mihpli pateng shuh naduh ba ka Saia Nongum ka la um hin-ly-hin ka longrynñieng jongka na ka apot ba ka la shem. Jar la katta, katkum ka nongrim kiwei kiwei ki jait syiem ruh la ñiew ba ki don ka bor ka iktiar ban pynkhiah, ban law ban loit kum ki syiemblei namar ba ki dei kiba la shah jied ban shimti ïa ka longsyiem mansyiem lyngba ka ktien kaba da ïapan na ki blei ki dken. Kane ka riti dustur ka long katkum ba la ïathuh pateng ki tymmen ki kro, kiba la hiar pateng na ki longshwa manshwa. Jar la katta, lada don kaei kaei kaba lymbiang, la nguhlet ban ym bat ïa kano kano ka lait ka let bad khmihlynti ka jingshai kaba pura na kano kano ka liang. Shuh shuh la sngewthuh ba ki don ki jha kiba tbit bad kiba lah ban law ban loit na la ka sapthaw ka buitthaw lajong wat lada kim dei na ka kpoh longsyiem, kumjuh ruh ki don pat ki pateng longsyiem kiba ym tip shuh la ka riti ban law ban loit ne ban pynkhiah ïa kiba shah khap thlen ne kino kino ki kam aiksuid aikhrei.
Ha ka ktien phareng ïa ka kam rithlen lah ban pynïakop bad ka ktien ‘Sorcery’ lane ‘Necromancy’, wat lada kam da dei thik kumta. Ha ba shim kyllum pat lah ban jer ‘Witchcraft’ lane ‘Vampirism’ ruh tangba ki la kham jngai na ka jingmut ba shisha. ïa u Thlen la ju tip ym tang kum uta u ksuid ban klun ïa ka rngiew jong ki briew haduh ba kin da khrew bad iap jynduh, hynrei ka dei ïa u kynja bseiñ baheh uba ym ju puh da ka sni, hynrei uba klun ban bam ïa kaei kaei. Namar ba ka ktien thlen ka la shynna haduh katta katta kum uta u ksuid u ba klun tylli marmet ïa kiba jemrngiew naduh mynnor, kumta ki briew ha ka imlang sahlang ki la sngewthuh beit thik kumta. Kum ïa uta u mrad kynshia batriem bad shyrkhei, ha ka ktien phareng lah ban jer ‘Mammon Serpent’.
