Damascus, Iaïong:
U Myntri ka tnat kam bar ri jong ka Iran, ha ka Sngi Nyngkong u la plie thymmai biang ia kawei ka tnat ba dei khmih ia ki nong Iran hapoh ka nongbah Damascus jong ka Syria hadien shi taiew ba shlem treikam jong katei ka tnat ka la shah pynjulor ha ki bom bad ki ‘namding jong ka Israel.
Ha kajuh ka por ruh, ka Iran ka la smai ba kan pynhiar kput ia ka Israel halor katei ka kam thombor ba la leh da ki shipai ka Israel ha ka taiew ba la leit, ha kaba 7 ngut ki dkhot ka Islamic Revolutionary Guard Corps (IRGC) ki la duh ei ia ka jingim ha katei ka jingjia.
Katei ka jingleit thombor jong ka Israel sha Syria ka long ruh ha kum kane ka por ba ka Israel ka dang bteng ban leit hiar thma khlem sangeh ia ki lehnoh Hamas kiba synshar ia ka nongbah Gaza mynta da ki phew snem.
Namar la ong ba ka Syria bad ka Iran ki la pharep bad kdew kti beit-beit ia ka Israel halor katei ka kam thombor kaba la jia ha katei ka nongbah ha katei ka taiew ba la leit.
Kumta, la ong ba u Myntri kam bar ri jong ka Iran, u Hossein Amir-Abdollahian ha katei ka sngi u la ioh ban plie thymmai pat ia katei ka tnat treikam ba thymmai jong ka Iran hapoh Syria ka ban khmih ia ki nong Iran kiba don hapoh katei ka ri Syria.
Ha katei ka sngi, la ïadon ryngkat ruh da ki heh ka Syria kiba kynthup ia u Faisal Mekdad bad kiwei de ki heh na katei ka ri.
Ha katei ka sngi la pynbeit ruh ba u Amir-Abdollahian un leit kynduh ia u President- Bashar al-Assad bad la ong ba ka jingiakren jong kitei ki heh na kitei ki ri, kan long beit kumno ban pynhiar kput bad pynphai kylliang ia ka jingleh jong ka Israel ha katei ka taiew ba la leit.
La ong ba utei u Myntri ka tnat kam bar ri jong ka Iran u la sdang ia katei ka jingleit jurip ba kyrpang jong u sha Oman ha ka Sngi U Blei.
