Jowai, Ïaïong 09
Ka Efty United XI Mynso ka la pynliem noh ïa ka West Jaiñtia Police Cricket Club da 8 wiket na ka bynta ban khur ïa ka jingjop ha ka lympung ïalehkai’District Cricket League 2024′ ba la pynïaid da ka West Jaiñtia Hills District Cricket Association (WJHDCA).
Ha kane ka jingïakhun kaba la long ha ka sngi ba-ar ha madan Khliehtyrshi Mini Stadium, ka West Jaiñtia Police Cricket Club ka la kam trai ban tied nyngkong hadien ba ka la jop ïa ka kynting pisa bad ka la kamai 122 run ha ka 26.3 over bad shah pynhap wiket baroh ki nongtied. U Markini Lathong u la kamai 24 run na ki 25 bol, katba na ka liang ka Efty United u Sanvert Kurkalang ula pynhap 3 wiket na ki 7 over bad u Eleazer C. Dkhar u la khur 3 wiket na ki 6.3 over.
Haba wan shimti ïa ka pali kaba ar, ka Efty United XI ka la lah ban kynjoh sha ka thong da kaba kamai 123 run ha ki 11.5 over bad shah pynhap 2 wiket. U Sanvert Kurkalang u la tied 56 run na ki 21 bol bad u Levester Phawa u la ïoh 20 run na ki 17 bol. Katba na ka liang WJPCC u Riboklang Hynñiewta u la khur 2 wiket na ki 7 over. U Sanvert Kurkalang jong ka Efty United XI Mynso ula khur ïa ka nam ‘Man of the Match’.
