Shillong, Ïaïong 09
Kum shi bynta ban lehkmen ïa ka jingdap 25 snem ne ka Jubili Rupa jong ka Higher Secondary Section, ka Sacred Heart Girls Higher Secondary School, Mawlai Phudmuri ka la pynlong da ka Inter School Sports Meet 2024 ha madan Savio Juniorate, Mawlai Umjaïur hynne ka sngi ba-ar.
Ïa kane ka Sports Meet la kyntiew lama bad thang sharak plie da u Bah P.T Sawkmie, MLA barim ka Mawlai, uba la long kum u kongsan. Kane ka jingïalehkai kaba la sdang hynne ka sngi kan kut ha ka sngi Balang.
Ha kane ka sngi plie pyrda la don ka jingïakob ïaleh March Pass ba la ïashim bynta da ki khynnah skul shynrang bad kynthei jong ka Church of God HSS (Ecclesia) kaba na Mawlai Nongkwar, ka St. Francis D’ Assisi Secondary School na Mawlai Kyntonmassar, ka Mawlai Christian SS na Mawlai Motsyiar bad ka Phudmuri Presbyterian HSS na Mawlai Phudmuri, katba ka Savio Juniorate la shim bynta da ki khynnah shynrang bad khlem da klet ïa ka skul ba pynïaid ka Sacred Heart Girls HSS da ki kynthei.
Ïa kane ka jingïakob March Pass la ïoh rah da ka Sacred Heart Girls HSS na ki kynthei bad ka Phudmuri Presbyterian HSS na ki shynrang.
Haba ai jingkren kum u kongsan u Bah P.T Sawkmie u la ai khublei bad pynpaw ïa ka jingsngewnguh ïa ka Sacred Heart Girls HSS kaba la khot sngewbha ïa u kum u kongsan ban plie pyrda ïa kane ka Inter School Sports Meet 2024 bad ban ïoh don bynta lang ha kane ka jing-leh kmen jong ki.
Ha kane ka sngi la kren pdiang sngewbha da i Sister Superior, Theresa Kamsuan, iba la pynpaw ba u Bah PT Sawkmie, u dei u hynmen, u paralok bad u nongkyrshan baradbah jong ki. La ïoh ruh ïa ki kyntien ai khublei na i Sister Betina Kurbah, ha ka jingdon ryngkat Principal Evelyne Joy Kimpat, u phadar ba khmih ïa ka Savio Juniorate, ki nonghikai bad kiwei kiwei.
