Shillong, Ïaïong 09
Ka jingpyrta ‘Ha U Prah’ ka la sawa sa ha ka jingïalang ïalap ilekshon ka Congress kaba la pynlong ha ka janmiet Sngi Ba-ar ha Mawlai Phudmuri Stand Bus ha kaba ki nongïalam ka Congress kynthup ïa u President, Bah Vincent H Pala ki la ai jingkren bad pynsngew ïa ki nongrim ka Congress bad ki kam ba ka la leh ha ka por ba la leit khamtam ka jinglaitluid bad bym tuklar ïa ka niam ka rukom bad ki riti ki dustur jong ki jaitbynriew bapher bapher da kaba ai nuksa ruh ïa ka jingjia ha Manipur ha kaba ka Sorkar BJP kam shimkhia ei ei ïa ki riewlum bad ki ritpaid.
Kane ka jingsawa ka sur pyrta ‘Ha U Prah’ ka dei ha ka por ba dang ai jingkren ki nongïalam ka Congress ha ka por ba ai jingkren u Bah Pynshngaiñlang N Syiem, u MP uba dei ruh u kyrtong ka Congress u Bah Vincent H Pala bad kiwei kiwei.
Hynrei kine ki nongïalam ka Congress ki la kren la ka phang khlem pynsngap ïa ki nongpyrta bad ki la kren ban pynsngew ïa ki mat ilekshon sha ki paidbah kiba wan ban sngap ha Stand Bus kynthup ruh ïa kiba shong dukan naduh kiba die doh bad kiwei kiwei ki jingdie bad kiwei kiba shong na la ïing.
Haba ai jingkren, u Bah Pala u la pynkynmaw ïa ki nongrim ba ka Congress ka ïeng khamtam ban kynthup lang ïa baroh hapoh ka ri. U Bah Pala u la pynpaw ruh ïa ki jingeh kiba ka ri ka mad ha kine ki 10 snem naduh ba synshar ka BJP bad ka ka jingbymshngaiñ jong ki jaitbynriew bapher-bapher kiba don ha la ki jong ki jingngeit niam bad ka jinghiar ha ka ïoh ka kot jong ki nongshong shnong.
Une u MP u la pynsngew ruh ïa ki mat ilekshon kiba ka Congress ka la pyllait paidbah, naduh ki lad jingïarap ïa ki samla hapoh ka ri, ka jingshimkhia ban ïakhun pyrshah ïa u drok, bad ki jingmyntoi na ki skhim bapher bapher kiba yn sa pyntreikam ynda ïoh biang ka Congress ban lamkhmat ïa ka jingsynshar ha ka ri.
U Bah Pala u la ong ba ka jingbuhthong ka BJP ban ïoh 400 ngut ki MP ha kane ka ilekshon ka dei ka jingsyier namar ka la sngewthuh ba ki paidbah kim shaniah shuh bad ka BJP ka don ruh hapdeng ka jingïapait para nongïalam da kaba pynduh tiket ruh ïa kiba bun ki MP.
Kumta u Bah Pala u la kyrpad ïa ki paidbah ka Mawlai konstitwensi ban ai ka jingkyrshan ïa ka Congress khnang ba ka jingjop kan long ka jingshngaiñ sa shisien pat ïa ka ri bad ka jylla khamtam ïa ki ritpaid kiba im hapdeng ka jingsyier.
Kiwei ki nongïalam kiba la ai jingkren ki kynthup ruh u Bah Pynshngaiñlang N Syiem, u Bah Manuel Badwar, Bah JA Lyngdoh bad kiwei pat ki nongkitkam ka Congress ha Mawlai kiba la kren shaphang ki kam babha ba u MP bad ka Sorkar Congress ka la leh naduh ba ïoh laitluid ka ri India haduh ba ïoh ïa ka Jylla Meghalaya.
Ki nongkren ki la pynsngew sha ki paidbah ïa ki kam kiba ka Sorkar BJP ka leh ha kine ki snem ban pynsaja ïa ki paid nongshong shnong da kaba wanrah ki mat treikam kiba har rukom kiba wanrah ka jingïapher jaitbynriew, ka jingsngew niam bad pynshong syier ka ki ritpaid da kaba pyni nuksa ïa ka jing umsnam ha Manipur ha kaba ka jingïakynad ka ïai bteng namar ka jingleh bym salia ka BJP.
Ki la ai nuksa ïa ki aiñ kiba ka Sorkar BJP ka la wanrah kum ka CAA, bad ka jingsdang ban pynïaid shakhmat sa ïa ka Uniform Civil Code (UCC). Kumta ki la kyrpad ïa ki paidbah nong Mawlai ban ai ka jingkyrshan ha kane ka ilekshon MP bad jied ïa ka Congress bad ïa u Bah Pala ban don biang ka jingshngaiñ.
Ki nongkren ki la ong ruh ba ka ilekshon MP ka ïapher na ka ilekshon MLA ne MDC bad ki paidbah ruh ki sngewthuh bha ban pynïapher bad tip ruh ïano ban jied ban phah leit sha Parliament namar ki sngewthuh ba dei ka Congress kaba biang eh ban ïasaid na ka bynta ka ri bad ka Jylla Meghalaya.
