Shillong, Ïaïong 09
Ka Voice of the People Party (VPP) ha ka Sngi Ba-ar ka la kyrpad ïa u Chief Electoral Officer (CEO) ka Jylla ban pynshitom ïa u Bah Pynïaid Sing Syiem, nongïalam ka National People’s Party (NPP) katkum ki kyndon halor ki jingkynnoh ba khlem nongrim jong u pyrshah ïa ka seng.
“Nga kwah ban pynphai khmat ïa phi sha ki jingkynnoh ba khlem nongrim jong u Bah Pynïaid Sing Syiem, u nongïalam ka NPP, ba ka VPP ka la wanrah ne pynthut ïa ka shongsuk-shongsaiñ ha ka por ba long ki jingïalang ka NPP,” la ong u Election Agent ka VPP, Bah Danny Langstieh ha ka kyrwoh ba la phah sha u CEO.
U Bah Langstieh u la ong ruh ba u Bah Syiem u la pynmih ïa kitei ki jingkynnoh ha ka 6 bad 8 tarik u Ïaïong, 2024 katba dang ïashim bynta ha ka jingïalap ilekshon na bynta ka seng jong u ha Rynjah, East Khasi Hills bad Umsning, Ri-Bhoi.
“Ngi kyrpad ïa ka shlem treikam jong phi ban pynshitom katkum ki kyndon,” u la ong.
Ha kajuh ka por, u la ong ba ka seng ka kwah ban ujor pyrshah halor ka jingleh bor bad ka jingktah kti jong ki briew kiba don ha ka jingïalang ka NPP pyrshah ïa ki ‘riew paidbah tang namar ba ki pyrta ïa ka shap jong ka VPP.
