Shillong, Ïaïong 09
Ka Shillong Lajong FC ka la lah ban pynliem noh ïa ka Nongthymmai SC da 6-3 kol na ka bynta ban khur ïa ka jingjop kaba lai ha ka lympung ïalehkai Shillong Premier League 2023 ha ka Sngi Ba-ar ha SSA Stadium kaba ha First Ground, Polo.
U Deibormame Tongper (26, 42 & 60) u la khur ïa ka hat-trick na ka bynta ban long kum u khlur ïalehkai ba kynsai ha kane ka aïom, katba ïa ki ar kol la thep da u Babysunday Marngar (51 & 90+2) lem bad u Shano Tariang (61).
Ha kane ka jingïakhun ka Nongthymmai ka la sdang ban ïalehkai bha naduh kaba sdang ha kaba ka la ïoh ban pynkhih jar nyngkong eh ha ka mint kaba 11 lyngba u Robi Hansda. Kane ka shi kol ka la nang pynïoh mynsiem ïa ki rangïaleh-kai kane ka kynhun bad tang hadien phra minit ka la pynbud biang ïa ka kol kaba ar lyngba u Nitesh Hazra na ka bynta ban tam 2-0 kol.
Wat la ka Lajong ka la shah thep ar kol, hynrei ka la wanphai da ka jingkhlaiñ bor ban pynphai kylla lyngba u Deibormame ha ka minit kaba 26. Une u rangïalehkai shakhmat u la pynbud biang ïa ka kol kaba ar ha ka minit kaba 42 na ka bynta ban ïakhaid mar 2-2 kol ha ka kylla step.
Hadien shi minit ba la bteng biang ïa ka jingïakhun jong ka kylla miet, ka Nongthymmai ka la tam biang sa shi kol lyngba u Sambor-lang Nongbsap ha ka minit 46. Hadien 5 minit ka Lajong ka la lah ban pynïakhaid biang lyngba u Babysunday.
Ka Lajong ka la bteng biang ban ïakhun tyngeh bad dei ha ka minit kaba 61 ka la ïoh ban thep ïa ka kol kaba saw lyngba u Shano Tariang ha ka minit kaba 61. U Deibormame u la khur syndon ïa ka hat-trick hadien ba u la ïoh ban thep biang ïa ka kol kaba lai ha ka minit kaba 70. Kumta shwa ban wai artad ka jingïalehkai, u Babysunday u la thep biang sa shi kol ha ka minit kaba 90+2 na ka bynta ban pynlong ïa ka Lajong ban khur ïa ka jingjop kaba lai ha kane ka lympung.
Da kane ka jingjop, ka Lajong ka la ïalam ïa ka kyrdan ba hakhlieh ha kaba ka la ïaryngkat mar 9 point bad ka Rangdajied United, kaba la hiar sha ka kyrdan ba-ar. Katba ka Nongthymmai ka dang ïai sah ha ka kyrdan ba-ar na shatrai bad kamai 3 point na ki saw sien ïakhun.
Ka jingïalehkai ha ka sngi Balang kan long hapdeng ka Sawmer pyrshah ïa ka Langsning FC ha ka por 3 baje janmiet.
