Shillong, Ïaïong 09
Ka Voice of the People Party (VPP) ha ka Sngi Ba-ar ka la kyntu ïa u Chief Electoral Officer (CEO) ka Jylla ban pyntikna ba kan ym don kano-kano ka jingpynthut haba ïadei bad ka jingïaid beit jingïaid ryntih jong ka ilekshon ban wan sha ka Lok Sabha.
“Da ka jingsngewkhia, nga kwah ban ong ba katkum ki jingtip ba la ïoh lum da ki nongtrei jong ka seng, ki lah ban don ki jingpyrshang ban tuklar haba ïadei bad ka jingïaid beit jingïaid ryntih jong ka ilekshon hapoh ka Jylla khamtam ha ki distrik jong ka Ri-lum Jaiñtia da ki runar kiba thmu myntoi shimet,” la ong u Election Agent ka VPP, Bah Danny Langstieh ha ka kyrwoh ba la phah sha u CEO.
U la ong ba ka lah ruh ban don ka jingthep ‘vote’ tuh (Proxy) lada ki ‘Polling Official’ kim long kiba peitngor bad minot ïa ka kam ba la bynshet ha ki na bynta ka jingpyntikna ïa ka ilekshon kaba ïaid beit ïaid ryntih.
“Haba ïadei bad katei ka jingkdew haneng, ka seng ka kyntu jur ïa phi ban shim ki sienjam kiba donkam bad ban pyntikna ba ka ilekshon kaba ïaid beit ïaid ryntih kam dei ban shah pynthut bad ba ki nongthep ‘vote’ kin lah ban thep ïa ka ‘vote’ jong ki khlem kano-kano ka jingtieng bad ba ka jingthep ‘vote’ tuh kam dei ban jia,” la ong u Bah Langstieh.
