Moscow, Iaïong:
Ka Russia ha ka Sngi Nyngkong ka la pyntip biang ba ki shipai Russia ki la ioh ban siat pynbthei sa ia kawei ka drone na Ukraine kaba thmu ban leit thombor ia katei ka shlem Nuclear kaba heh tam hapoh ka dew-bah Europe bad kaba don ha Zaporizhzhia, ha kaba katei ka shlem Nuclear ka dei kaba la shimti bad hap hapoh ka kti ki shipai Russia.
Ka Russia ha katei ka sngi ka la iathuh ba kawei ka drone ‘Kamikaze’ ka la leit poi sha ka bynta ba shalor jong katei ka shlem nuclear ha Zaporizhzhia, ha kaba ki shipai katei ka thaiñ ki la ioh ban siat pynbthei bad katei ka drone ka la leit hap ha ka bynta kaba 6 (Unit 6) jong katei ka shlem Nuclear.
Shuh shuh ruh ka Russia ka la iathuh ba ka Ukraine ka la pyrshang haduh lai sien ban leit thombor ia katei ka shlem Nuclear kaba long ka jingma kaba khraw ym tang ia ka Ukraine ne ia ka Russia hynrei ia ki ri ba marjan kiba don hajan ka Russia bad Ukraine lada katei ka jaka kan bthei ne julor.
Namar la ong ba katei ka shlem pynmih Nuclear ka dei kaba la shah kurup ha ki shipai ka Russia naduh u snem 2022 hadien ba ki la ioh ban pynliem ia ki shipai ka Ukraine ha katei ka nongbah bad ki la ioh knieh syndon ia katei ka shlem Nuclear kaba heh tam hapoh ka dew-bah Europe bad haduh mynta, katei ka shlem Nuclear ka dang hap hapoh ka jingkhmih bad ka bor jingpyniaid jong ka Russia.
