Shillong, Ïaïong 09
U Symbud Myntri Rangbah ka Jylla, Bah Prestone Tynsong bad uba khmih ïa ka tnat Kam Pohïing, u la ong u Bah Adelbert Nongrum u khlem pule bha ïa ka Office Memorandum (OM) ba la pynmih ha ka 3 tarik u Rymphang 2022, ha kaba ïadei bad ka rta thung kam.
Lah ban pynkynmaw ba u MLA ka VPP na North Shillong, Bah Adelbert Nongrum, u la kynthoh ba ka rukom khot ban thep kam pulit da ka Central Recruitment Board ka long kaba be-aiñ bad kaba khlem ïaid satia katkum ka Office Memorandum jong u snem 2022.
Haba kren sha ki lad pathai khubor ha ka Sngi Ba-ar, u Bah Prestone u la ong ba ka OM ka la batai shai ba ha baroh ki kam sorkar la pynjlan ïa ka rta sha ka 32+5 snem, kaba mut haduh 37 snem ka rta. Hynrei u MLA ka VPP u khlem pule pat ïa kaei kaba la kdew lang ha kato ka OM, kaba ong lait noh ïa ki katto-katne tylli ki tnat ba kynthup ïa ka Home Police, Excise Registration Taxation & Stamps, Home Guard & Civil Defence bad ka Forest and Environment.
“U Bah Adelbert u la pule tang ïa ka paragraph kaba nyngkong bad u la iehnoh ïa ka paragraph kaba khatduh, kaba pyni shai kdar ba katei ka OM kan ym treikam na ka bynta ki katto-katne ki tnat sorkar kum ka Home (Police), Forest and environment, ERTS bad kiwei kiwei”.
U Bah Prestone u la ong ba ka Physical Fitness lane ka jingbiang ha ka met ka phad bad bor met, ka long kaba kongsan tam ha ka jingthung kam ha ka tnat Meghalaya Police.
U la ong, na ka bynta ka kam pulit ka Sorkar ka la rai ban pynbeit thymmai ïa ka rta thep kam, ha kaba ïadei bad ka kam Sub Inspector (SI), ka Kynhun Myntri (cabinet) ka la mynjur ban ailad haduh 27+5 snem ka jingpynjlan, kaba mut haduh 32 snem na ka bynta ki Schedule Tribe.
Na ka bynta ki constable, u la ong ba la buh naduh 18 snem haduh 21+5 snem ka jingpynjlan, kaba mut la ailad haduh 26 snem ka rta. Kane ka rai ka long namar ka long ka kam kaba eh bad donkam ruh ban pyndep ïa ka jingshah hikai kilan met. Na ka bynta ka kam Followers u la ong ba la shim naduh 18 snem haduh 27+5 snem, kane ka kam ruh ka dei haduh 32 snem.
U Bah Prestone u la ong ba kane kam dei kaba la leh khyllah tang ha kane ka Jylla, bad u la kyntu ïa ki samla ba kim dei ban sngewthuh bakla ïa ka jingkren u Bah Adelbert, bad ki dei ban thep ïa ki kam ba lait katkum ka jingpynbna (advertisement).
U Symbud Myntri Rangbah u la kyntait ïa ka jingkynnoh u Bah Adelbert Nongrum, ba ong ba ka jingpynmih ïa ka jingpynbna lait kam pulit ha Meghalaya ka long kaba be-aiñ.
U Bah Prestone u la ong ba ka Sorkar ka dang ap ïa ka jubab na ka Election Commission ban ai jingbit ban plie noh ïa ka ‘online application’ kaba la dei ban sdang naduh ka 8 tarik Ïaïong, hynrei haduh mynta ka ECI kam pat ai kano-kano ka jubab.
“Nga kyntu biang sa shisien ïa ki samla kynthei bad shynrang ba kim dei ban sngap ïa ka jingkren u MLA, hynrei ki dei ban ïeng skhem beit bad ban long kiba la pynkhreh ban thep ïa ki aplikeshon ki jong ki lyngba ka online,” u la ong.
