Shillong, Ïaïong 09
U President ka National People’s Party (NPP) Meghalaya, Bah Prestone Tynsong uba dei ruh u Symbud Myntri Rangbah ka Jylla, u la kyrpad ïa ki nongkyrshan ‘Prah’ ba kim dei ban ïaleh biej kumne namar kam long kaba itynnat naba ka ilekshon ka la kut ha ka 19 tarik.
“Nga kyrpad ïa ki nongkyrshan u Prah ba sngewbha ynnai ïaleh biej kumne, kam itynnat, ka ilekshon ka la kut 19 tarik, ynda la dep ngin hap ïa ïaid ïa ïeng, ïa trei ïa ktah para ma ki, sngewbha ïa burom, kam ju don kano-kano ka huri-hura ha ka por ilekshon, la phi ong ka MLA, MDC ne MP hynrei balei mynta ka kynti khamtam ha kane ka ilekshon MP kaba ym itynnat ban jia kumne,” la ong u Bah Prestone haba kren sha ki lad pathai khubor ha ka Sngi Ba-ar.
U Bah Prestone u la ong, ka kamram jong ki paidbah ka long ban sngap ïa ka nia ka jutang jong ki kyrtong ne ïa ki nongrim jong ki seng bapher-bapher. “Nga kyrpad ïa ki paidbah sngewbha ba lada don ha kano-kano ka seng ruh, sngewbha ynnai pynthut ne ynnai leit hi ruh ban peit ne ban sngap ïa ka jingïalap ilekshon lada phi la don lypa ka jingmut bad kyrshan ïa kaba phi la mon,” u la ong.
U la ong ba kane ka jingleh ki nongkyrshan ka VPP ban pynthut ïa ki jingïalang ïalap ilekshon jong ka NPP ka dei tang ka ‘kam kutlad’ namar ki tip ba kin rem ha ka ilekshon. “Ngam tip balei ki briew ki sngew kutlad. Hato dei namar ki tip ba ki la shah rem, balei ba kin leh ïa kum kine ki kam?” la ong u Bah Prestone.
Une u nongïalam ka NPP u la pynpaw ïa kane halor ki jingjia kiba jia ha Mairang, Umsning, Jaïaw bad kiwei kiwei ki jaka ha kaba ki nongkyrshan ka VPP ki la leit ban pynthut ïa ki jingïalang ka NPP.
“Nga la sakhi da lade, ïa kine ki jingpynwit la ka dei ha Mairang ha ka por ba kren u Bah Batskhem Ryntathiang, MDC bad ha Umsning por ba kren ka Kong Ampareen Lyngdoh, bad ngam tip ba kine kiba pyrta ki dei kiba buaid ne kumno,” u la ong.
“Kane ka long ka bym itynnat ka rukom long, lada kwah ban pyrta, pyrta shano-shano ka jaka bym long jingïalang, wat kren ha ka jaka ba dang long jingïalang,” u la ong bad bynrap baroh ki seng saiñ pyrthei ki hap ban burom, namar kane kam dei ka akor ki Khasi, imat kine na ka liang ka VPP i ba ki long kutlad, kumba ka umsaw la jan hiar bad kut pynban, kin hylla kin kren kin pyndik, ka jingmut ka long kumta.” la bynrap u Bah Prestone.
Kumta na ka liang u Bah Prestone u la ong ba ka NPP kan sa thoh sha u Returning Officer (RO) ka Shillong Parliamentary Constituency ban shimkhia ïa kane namar ba kam itynnat bad ïoh ka poi sha ka jingïashoh-jingïadat.
Haba kyntu ïa baroh ki seng saiñ pyrthei ba kin kiar na kum kine ki kam ki bym lah ban pdiang, u Bah Prestone u la ong, “To ngin pynthikna ba ka burom jong ka Jylla ka kham long kongsan ban ïa kiei-kiei baroh. Kino-kino kiba kwah ban thep ‘vote’ ïano-ïano ruh, ngin ieh ha ka jingstad jong ki nongthep ‘vote'”.
