Shillong, Ïaïong 09
U Chairman ka Umsning Town Dorbar, Bah Rocky Kylla, u la kyntu ïa ki seng saiñpyrthei naduh ka Voice of the People Party (VPP) bad ka National People’s Party (NPP) ba kim dei ban pynheh ïa ka jingjia ha ka janmiet jong ka 8 tarik Ïaïong na jingmih ka jingïakajia ha ïew Umsning namar ka dei kaba rit bad na ka liang ka Town Dorbar ka la dep pynbeit.
Haba buddien ïa katei ka jingjia, u nongthoh khubor u la ïoh ban ïakren kyrpang bad u Bah Rocky ha shlem treikam ha Umsning, Ri Bhoi District uba la ïathuh ba kito ki briew kiba shah rah ha ki pulit kiba wan pyrta ‘Ha U Prah’ ha jingïalang NPP ki la lait noh ha kajuh ka miet hi.
U la ïathuh ba hynnin ka sngi, la don uwei uba la wan pyrta ‘Ha U Prah’ katba dang kren ka kyrtong ka NPP, ka Kong M Ampareen Lyngdoh, bad wan sa kawei ka kali kaba la pyrta ‘Ha U Prah’ kaba la pynthut haba dang ai jingkren bad ïa kine la rah noh da ki pulit.
Namarkata, u la kyntu ïa baroh ar tylli ki seng saiñpyrthei ba kim dei ban pynheh ïa kane ka jingjia kaba rit khnang ban wanrah ka jingshongsuk hapoh ka thaiñ Umsning bad ha baroh ka jylla.
Ha kawei pat ka liang, u la ong ka jinghylla ‘Ha U Prah’ ka dei ka jingsngewtynnad jong ki briew, hynrei kam long kaba dei ban leit hylla ha kano-kano ka jingïalang jong kiwei ki seng namar kan pynwit.
U la pyntip ruh ba wat ha ka por mynstep kaba dei ka jingïalang ka UDP, u la don uwei uba pyrta arsien ‘Ha U Prah’ bad haba u la leit kren ïa u, uta u briew ruh u la sngewthuh ïa ka jingbakla bad u la leit panmap na u Bah Metbah Lyngdoh uba dei u President ka UDP.
Halor kane ka jingjia, na ka liang ka NPP ha ka Sngi Ba-ar, ka la thalaiñ tyngeh ïa ka VPP namar ka jingpynsaphriang ïa ka jingkynshoit politik ban isih ha Ri-lum Khasi bad Jaiñtia namar ka jingbym lah ban pynkohnguh ïa ki paidbah da ki jingkular ba thylli jong ka seng.
Kane ka la jia shisngi hadien ba ki nongkyrshan ka VPP ki la leit pynthut ïa ka jingïalap ilekshon jong ka NPP kaba long ha Umsning, Ri-Bhoi District, Mairang, Eastern West Khasi Hills, Jaïaw bad Rynjah ha Shillong.
Ha ka kyrwoh ba la pyllait mynta ka sngi da u Nongaiktien ka NPP, Bah Himalaya M Shangpliang, u la ong ba ka seng ka pynrem jur ïa ki jingleh jong ka VPP bad ki nongkyrshan ban pynthut ïa ki jingïalap ilekshon jong ka seng bad ruh ban kren ïa ki ktien sih ktien sang pyrshah ïa ka kyrtong jong ka NPP.
U la pyntip ba ka seng ka la dawa ban tuklar mardor da ka Election Commission ka India (ECI) pyrshah ïa ki nongïalam jong ka VPP namar ka jingpynthut ïa ki jingïalap ilekshon jong ka NPP.
U la ong ba kane ka pyni shai ba ka VPP ka la nang blaw na ka jingduna ka jingwan kyrshan na ki paidbah. Ka VPP kam shym la lah ban pynkohnguh ïa ki paidbah da ki jingkular ba thylli. Kumta, ka la shim ïa ka lynti ban pynkulmar bad pynthut ïa ki jingïalang ïalap ilekshon jong ka NPP.
U la ong biang ba jingjia ha ka janmiet 8 tarik mynta u bnai ka dei kaba pynpaw shai kdar ba ka VPP ka sngewthuh ba ki jingkynnoh jong ka, kim shym la treikam satia pyrshah ïa ka NPP. Dei na kata ka daw mynta ka la pyrshang ban pyneh da ki dohksah pyrshah ïa ka NPP. U nongïalam ka NPP na Mawryngkneng, Bah Pynïaid Sing Syiem u la kdew ba ka VPP ka pyrshang ban wanrah ïa u khñiang na West Bengal ha kane ka ilekshon namar kine ki jingjia ki pynshisha ba kam lah shuh ban buhrieh ïa ka jingshisha ba ka VPP ka dei ka Team B jong ka TMC.
U Bah Shangpliang u la dawa ruh ban leh eiei pyrshah ïa ka VPP namar ka jingpynthud ïa ki jingïalap ilekshon jong kiwei ki seng kaba long ka jingpynkheiñ ïa ki kyndon ka ECI bad ka jingthmu ban pynlong ïa ka ilekshon kaba khuid bad suba.
Nalor nangta, u la ïathuh ba ka NPP kan sa buh ïa ka jingujor pyrshah ïa ki nongïalam ka VPP namar ka dei ïa ki ban shim ïa ka jingbahkhlieh lada mih kano-kano ka jingkulmar ba pynthut ïa ka shongsuk-shongsaiñ.
Ha kawei ka liang u la pynpaw ruh ka jingsngewsih ba kine ki dei kijuh ki briew kiba ïalap halor ka Clean Politics (saiñ hima-sima bakhuid) hynrei ki kam pat ki long da pyrdet. U Bah Ardent u dei ban leh ïa kaei kaba u ïalap bad sangeh ban ïalam bakla ïa ki paidbah ba ieid jingsuk da ki buit politik ba arsap jong u, u la ong.
Na ka liang u nongaiktien ka VPP, Dr. Batskhem Myrboh, u la ong balei ki nongïalam NPP ki da shoh bad byrngem phah kem ha ki pulit ïa uwei ar ngut ki ‘riew paidbah haba pyrta ‘prah’ katba dang ïaid ka jingïalang ka NPP ha Umsning.
U Dr Myrboh u la ong ba ki paidbah ki sngewtynnad ban pyrta ïa ka shap u prah da ki shu kren da ka ktien ka la biang, hynrei ban da shoh bad byrngem phah kem kam lah ban long. U la ong ba kane ka jingpyrta prah ki paidbah ka lah ban dei ba ki bitar ïa kane ka sorkar NPP.
