Shillong, Ïaïong 09
Ka Voice of the People Party (VPP) ka pynrem bad kyntait ïa ka jingkynnoh u nongïalam ka NPP, u Bah Pynïaid Sing Syiem ba ka seng ka wan ban pynthut ïa ka jingïalang paidbah jong ka NPP.
“Kine baroh ki dei ka jingkren lamler ba khlem ïasnoh bad ka jingshisha ba tang shi saphit ruh. Kum ka seng, ngi dawa ba u dei ban sei ïa ki sakhi ban pynsabut ba kito kiba wan ban pyrta ‘Ha U Prah’ ki dei ki dkhot jong ka seng ne ki dei kiba la bthah da ngi kum ka seng,” la ong u nongaiktien ka VPP, Dr. Batskhem Myrboh ha ka kyrwoh.
U la ong ruh ba ka long kaba sngewsih ban ïohi ba tang na ka jingpyrta ‘Ha U Prah’ jong uwei ne ar ngut ki briew ki bym tip ki wan naei, kan wanlam pynban shaduh u pud ba kin shah ktah kti.
“Ngi dawa ba kito kiba donkti ban ktah kti ïa kito ki ‘riew paidbah ban pynshitom katkum ki kyndon jong ka aiñ. Kaei kaba ki nongïalam ka NPP kiba don ha kato ka jaka ki leh ruh ka paw shynna ïa ka jingdukha mynsiem jong ki bad ka jinglong khynnah ka bym lah ban tehlakam kum ïa ito i jingjia barit eh,” u la ong.
Ha kawei ka liang, u Dr. Myrboh u la ong ba kaba kham buh jingma ka long ka jingai hukum da utei u nongïalam ka NPP ban kem mardor khlem da bud satia ïa ki kyndon jong ka aiñ ïa kito ki ‘riew paidbah kiba shu pyrta ‘slogan’.
“Kane ka pyni shai kdar sha ka pyrthei ïa ka jingpyndonkam bakla ïa ka bor da ki nongïalam ka NPP bad kam phylla shuh ba u paidbah un pynpaw ïa ka jingsngewbitar ïa ka jingleh jong ki,” la ong u nongaiktien.
“Kum ka seng ngi kyntu jur ïa ki nongkyrshan jong ka seng ba kin ym pyrta ki ‘slogan’ pyrshah ïa kino-kino ki nongïalam jong kiwei pat ki seng saiñ pyrthei kiba kim kyrshan hynrei ban bat ïa ka akor babha. Ngi kwah ban pynkynmaw ba ka kput bakhraw tam ïa ki nongsynshar donbor jong ki ka dei beit lyngba ka ‘vote’ ba ngin thep,” la ong u Dr. Myboh.
Shuh shuh u la bynrap, “Ngi kwah ban kyntu ïa ki nongkyrshan ka seng ba ki dei ban peitngor bha ïa ka jingleh ba la suh buit lupa ki seng ba don ha ka MDA ban pynjah burom ïa ngi khnang ba kin ïoh ‘vote’ sngewsynei”.
