Shillong, Ïaïong 09
U President ka National People’s Party (NPP) ha Meghalaya, Bah Prestone Tynsong, u la ong ba lada ka VPP ka pan sabut ban pynshisha ba kiba leit pynthut ïa ka jingïalang ka NPP ha Umsning da kaba pyrta ‘Ha U Prah! Ha U Prah’ ki dei ki dkhot ka VPP, nangne shakhmat ieh kan ïaid noh da ka aiñ.
Kane ka jingkren u Bah Prestone ka la long hadien ba u nongaiktien ka Voice of the People Party (VPP) Bah Batskhem Myrboh lyngba ka kyrwoh u la pynrem bad kyntait ïa ka jingkynnoh u nongïalam ka NPP Bah Pynïaid Sing Syiem ba ka VPP ka wan ban pynthut ïa ka jingïalang ka NPP.
U Bah Batskhem u la ong ba kine baroh ki dei ka jingkren lamler ba khlem ïasnoh bad ka jingshisha bad ka VPP ka dawa ba dei ban sei ïa ki sakhi ba kito kiba leit ban pyrta ‘Ha U Prah’ ki dei ki dkhot ka seng ne ki dei kiba la don kiba la bthah.
Halor kane, u Bah Prestone u la ong ba lada ka VPP ka buh ïa kum kata ka jingdawa, ieh lada ka jia biang kum kata yn phah kem noh ha ki pulit khnang ban ïaid ka jingtohkit bad ban lah pynshisha phah mano ïa kita ki briew. U la ong ba lada ong ban ïaid ka sakhi-satar ieh kan ïaid ka aiñ.
U la ong shuh shuh ba lada kim pynmih ïa ka ktien ‘Prah’ ka dang biang, hynrei ban pyrta beit ‘Ha U Prah! Ha U Prah’, hato kim dei mo ki nongkyrshan, bad bynrap ba ki paidbah kin bishar bad ki paidbah ki ïohi, namar ym tang ïa ka NPP hynrei wat u President ka UDP ruh u la shah kren bad shah pynthut hakhmat-hakhmat.
