Jowai, Ïaïong 10
Ka Phramer Cricket Club ka la pynliem da 1 wiket ïa ka Cultural Youth Club Mookaiaw ha ka lympung ïalehkai District Cricket League 2024 ba la pynïaid da ka West Jaiñtia Hills District Cricket Association ha madan Khliehtyrshi Mini Stadium ha ka Sngi Balang.
Ïa ka jingkynting pisa la jop da ka Cultural Youth Club Mookaiaw bad ka la jied ban tied nyngkong ha kaba ka la kamai 134 run ha 31.1 over bad shah pynhap wiket baroh ki nongtied. U Ardakirang Rymbai ula tied 62 run na ki 86 bol bad u Grateful Lyngkhoi u la ïoh 22 run na ki 27 bol. Katba na ka liang ka Phramer u Ïaineh Suchiang bad u Ebormi Laloo ki la khur mar 4 wiket na ki 7 over bad 5.1 over.
Haba wan shimti ïa ka pali kaba ar, ka Phramer ka la lah ban kynjoh sha ka thong da kaba kamai 135 run ha ki 28 over bad shah pynhap 9 wiket. U Deimiki Rabon ula tied 48 run na ki 36 bol bad u Pyrkhat Sari ula ïoh 23 run na ki 25 bol. Katba na ka liang ka CYC u Spaining Pyrhut u la khur 6 wiket na ki 7 over. Ïa ka nam ‘Man of the Match’ la khur da u Ïaineh Suchiang jong ka Phramer Cricket Club.
