Shillong, Ïaïong 10
U MLA ka Voice of the People Party (VPP) na North Shillong Constituency, Bah Adelbert Nongrum ha ka Sngi Balang jong ka taïew u la leit ban ujor da ka ejahar pyrshah ïa ka sorkar hapoh thanat Sadar halor ka jingpynduh ïa ka hok thep kam ki khynnah samla ka jylla khamtam ha ka tnad pulit na ka jingpynlyngkot ïa ka rta thepkam.
U Bah Adelbert u la leit ban buh ïa ka ejahar hakhmat u ophisar ba khmih ïa ka thanat Sadar, u Kamal Thapa.
Haba kren sha ki lad pathai khubor hadien ka jingujor ïa ka ejahar, u Bah Adelbert u la ong ba ka jingpynduhnoh ïa ka hok jong ki samla hadien ba la pynmih ïa ka jingpyntip paidbah halor ka jingthep kam ha ka tnad pulit kaba la pynmih ha ka 6 tarik u bnai Lber 2024, ka la ïatyngkhuh bad ka Office Memorandum jong ka 3 tarik u Rymphang jong u snem 2022 kaba long beaiñ ha kaba ha ka Office Memorandum, la ong ba na ka kyrta kaba 32 snem la kyntiew sha ka 35 snem kaba long 37 snem na ka bynta ki khun samla katba u Symbud Myntri Rangbah ka jylla pat, u Bah Prestone Tynsong u la ong ba kane kam long be-aiñ hynrei ka long kaba biang.
“Na kano ka dur jong ka aiñ ba phin pynrit noh pat ïa ka kyrta jong ki khun samla kiba dei hok ban ïoh ïa ka kam pulit khamtam ha kane ka por ka jingkyrduh kam kyrduh jam bad khamtam ruh ki khun samla ki la long kiba shlur mynta ban thep ïa ki kam pulit bad ka por ka la dawa”, la ong u Bah Adelbert.
U Bah Adelbert u la ong ba ka jingong jong u Symbud Myntri Rangbah ka jylla ba utei u MLA u khlem pule ne tip bha shaphang ka aiñ ka long kaba bakla namar ha shwa ba un kren halor kane ka bynta, na ka liang u Bah Adelbert u la ong ba u la dep ban pule bniah bad wad jingtip bha shaphang kane ka aiñ.
“Ka jingpynshai jong u Symbud Myntri Rangbah ka long ba u la ïalam bakla sa ma u ïa ki samla namar ba katba kim pat lah ban mynjur ïa ka hukum lyngba ka tnad Personnel kam pat long kaba biang”, la ong u Bah Adelbert.
U Bah Adelbert u la ong ba ka jingpynkheiñ ïa ka Office Memorandum da ka sorkar ka dei ka ‘Criminal Offence’ pyrshah ïa ka hok wad kam jong ki samla ka jylla bad ka jingpynbna paidbah ha kaba ïadei bad ka kam pulit ka long kaba be-aiñ khlem da bud ïa ki kyndon kiba la buh.
“Wat ïalam bakla Symbud Myntri Rangbah badonburom, wat ong ba phi la pas ïa ka kynhun Myntri hynrei phi khlem pas pat lyngba ka tnad Personnel kumba long kane ka OM ha ka 3 tarik u Rymphang 2022”, la ong u Bah Adelbert.
Shuh shuh u Bah Adelbert u la ong ba namar ka jingbunkam eh jong ki nongïalam ka sorkar jylla ha ki kam ilekshon ka la pynlong ïa ki ba kin leh klet noh ïa la ka jong ka jingkitkhlieh na ka bynta ki khun samla khamtam ha kane ka por kyrduh kam kyrduh jam.
“Ki la klet ïa la ka jong ka bynta bad ka kamram hynrei ki la bunkam palat da kaba ki la pynkhlaiñ palat ïa kata ka sur jong ka kam saiñ pyrthei bad kaba la tlot noh pat ha ka sur jong ki mat treikam”, la bynrap u Bah Adelbert.
