Shillong, Ïaïong 10
Ki briew ki bym lah satia ban tip ki dei kiei, ki la phah da ka shithi byrngem sha ar ngut ki Nongïasaid Aiñ ka Meghalaya High Court, bad hapoh kane ka shithi la thep lang ruh ar tylli ki kuli.
Halor kane ka jingshah byrngem jong ar ngut ki nongïasaid aiñ, la pyntip da ka High Court of Meghalaya Bar Association hadien ba ka la dep ban khot ïa ka jingïalang kaba kyrkieh ha ka Sngi Balang ban ïakren bad ïathir sani halor ka shithi shah byrngem jong ki nongïasaid aiñ.
Ha ka kyrwoh khubor ba la pyllait da u President ka High Court of Meghalaya Bar Association, u S Chakrawarty uba dei u Senior Advocate bad ka Secretary General Kong NG Shylla, Advocate ki la ong ba ka Synjuk ka pynrem jur ïa kane ka jingshah byrngem jong ar ngut ki nongïasaid aiñ ba pawkhmat ka Jylla.
Ka kyrwoh ka la ong ruh ba ki runar kiba la phah shithi, ki la byrngem ban leh da kaba tyngeh ïa kine ki nongïasaid aiñ lada ki dang ïai bteng ban mihkhmat ha kaban ïasaid ïa ka mukotduma ïa katto-katne ki briew (clients) bad ïashimbynta ha ka mukotduma ba donlang kine ki briew (clients).
Shuh shuh ki la pyntip ruh ba ha kane ka shithi byrngem ba la phah sha ar ngut ki nongïasaid aiñ, na ka liang ki runar ki la thep lang ruh ar tylli ki kuli.
Ki dkhot jong ka Bar Association da kawei ka sur ki la pynpaw ba katei ka jingleh ka long ka bym ïahap bad ka jingtuklar ïa ka kam kaba don ka jingkitkhlieh jong kine ki nongïasaid aiñ bad ong ba kam dei satia tang ka jingmushlia ïa ka hok ba kordor bad ba pynkup bor da ka Riti Synshar hynrei ka dei ruh ka jingthombor ïa ki païa jong ka imlang-sahlang kaba la shai.
Ha kaba ïadei bad kane ka jingshah byrngem jong ar ngut ki nongïasaid aiñ, ka Synjuk haba pynrem jur ka la pynthikna ruh sha baroh ki nongïasaid aiñ ba kan ïai don ryngkat beit bad ki ha kum kine ki khyllipmat.
