Shillong, Ïaïong 10
U Returning Officer (RO) ka Shillong Parliamentary Constituency u SC Sadhu, ha ka Sngi Ba-ar ka 9 tarik Ïaïong u la phah da ka shithi pan jingpynshai ne ka ‘show cause notice’ sha u President ka Voice of the People Party (VPP) u Bah Ardent Miller Basaïawmoit namar ka jingleit pyrta ‘Prah’ bad kynnoh ba leit pynthut ki nongkyrshan ïa ka jingïalang ka National People’s Party (NPP).
Kane ka jingpan jingpynshai jong u RO ka long ruh halor ka jingujor ba ha ka miet jong ka 8 tarik Ïaïong katba dang ïaid ka jingïalang ïalap ilekshon jong ka NPP ha Jaïaw, ki la don ki briew ïa kiba la kynnoh ba ki dei ki nongkyrshan ka VPP kiba la wan ban pynthut.
Katkum kane ka ‘show cause notice’, u RO ka Shillong Parliamentary Constituency u la pyntip ba u President ka VPP Bah Ardent M Basaïawmoit ban ai jingshai ha lane shuwa ka 12 tarik mynta u bnai ba balei ba ym dei ban leh eiei pyrshah ïa u katkum ki kyndon jong ka Model Code of Conduct (MCC). Katkum kane ka ‘show cause notice’, u Returning Officer u pyntip ba u la ïoh pdiang ïa ka jingujor ha ka 9 tarik ba ki nongkyrshan ka VPP ki la leit ban pyrta ‘Prah’ bad pynthut ïa ka jingïalang ïalap ilekshon jong ka NPP ha Jaïaw, ïa kaba ka NPP ka la hap ban pynsangeh noh ïa ka jingïalang.
Haba pyntip ba ka ECI ka la pyntreikam ïa ka Model Code of Conduct (MCC) naduh ka 16 tarik Lber, 2024, u RO u la ong ba MCC ka la buh kyndon ruh ïa ki seng saiñ pyrthei bad ki kyrtong ba ong, “Ki seng saiñ pyrthei bad ki kyrtong ki dei ban pynthikna ba ki nongkyrshan jong ki, kim dei ban pynthut ha lane pynthut ïa ki jingïalang ne ki jingïaid proseshon jong kiwei pat ki seng saiñ pyrthei”.
“Ki nongtrei ne nongïarap jong kawei ka seng saiñ pyrthei, kim dei ban pynmih jingkulmar ne pynthut ïa ki jingïalang ïalap ilekshon ba la pynlong da kiwei pat ki seng saiñ pyrthei da kaba buh jingkylli ïa ki kyrtong lane ai da ka jingthoh lane sam kot lyngkdop jong ka seng saiñ pyrthei lajong. Ym dei ruh ban pynlong ïa ka jingïaid proseshon da kawei ka seng saiñ pyrthei ha ki jaka ba long jingïalang kiwei pat ki seng saiñ pyrthei. Ym dei ban weng ïa ki ‘poster’ ba la tah da kiwei ki seng saiñ pyrthei da ki nongtrei jong kawei pat ka seng saiñ pyrthei”.
