Nongstoiñ, Ïaïong:
Ka Hynñiewtrep National Youth Movement (HNYM) ha ka jinghiar jurip ha ka Sngi Ba-ar ïa ka jaka pynlang umbam-umdih jong ka tnat PHE kaba don ha ka shnong Mawkaïang, ka la lap ba katei ka jaka ka long kaba dap da ki jaboh-jabaiñ.
Ka HNYM hapoh ka jingïalam u Bah Shormandar Sohshang, President ka HNYM Lailyngdoh Pyllun bad u Bah Jimverson Blah, President ka HNYM Nongkhlaw Unit lem bad ki nongshong shnong ha kane ka jinghiar jurip ki la lap ba naduh ki jingjiar (filter) ym shym la don ka jingtap, ka top um ruh khlem tap, ki jingkhang la pyut lut bad ka khyrdop ruh khlem don shuh, bad ki jingkhang ruh kim long kiba bit kiba biang la shu jot pathar.
Kitei ki nongïalam ka HNYM ki la ong, ha katei ka jaka namar ka jingbymdon shuh u nongap, ka la kylla long pynban ka jaka leh kam jakhlia ne ktem awria bad ïa kata la ithuh lyngba ki dak ki shin kiba la don ha katei ka ïing ap bad ka top um.
Ki la ong ruh ba katei ka um ka dei kaba pyndonkam ne dih da 5 bad 6 tylli ki shnong kaba kynthup ïa ka Nonglwai, Nongkhlaw, Pingbah, Mawkaïang, Nonglwai 2 bad kiwei kiwei. Ïa katei ka top ne jaka pynïoh um la khmih da ka JAC jong 5 ngut sordar shnong.
