UK, Iaïong:
Ki bor pyniaid ka UK ha kane ka por ki la pyntip ba uwei u rangbah 28 snem uba la pyniap ia la ka jong ka kurim bad mait lyngkhot-lyngkhai ia ki dkhot met jong ka, u la ju leh donbor bad thombor ia kiwei ruh ki kynthei kiba u don jingiadei ha ki snem 2013, 2016 bad 2017.
Kumta la ong ba kane kam long shuh ka sien ba nyngkong ia u ban leh ia kum katei ka jait kam runar bad ban thombor ia la ki jong ki baieid-bathoiñ ynda u la ngiah bad kwah ban jngai noh na ki.
Ha katei ka jingjia, la ong ba utei u rangbah u la pyniap bad mait pynmih haduh 200 tylli ki lyngkhot ia ka met jong katei ka kurim jong u. Bad da ka jingiarap jong u paralok ba ju iajan bad u, u la leit ban bret ia kitei ki lyngkhot met baroh sha kawei ka wah.
Katkum ba la ioh jingujor ha u snem 2013, utei u briew uba la ithuh kum u Nicholas Metson u la don jing-iakynad teng bad katei ka briew kaba don jing-iadei bad u ha utei u snem. Kumjuh ruh ha u snem 2016, u la don jing-iathut sa bad kawei pat ka briew kaba u dang don jingiadei thymmai ha kitei ki snem kiba bud.
La ong ba ha ka 5 tarik u Iaiong, u Nicholas Metson u la phla halor ka jingpyniap jong u ia la ka kurim kaba la ju ithuh kum ka Holly Bramley, 26 snem ka rta bad kane ka la jia ha u Lber jong u snem 2023. La ong ba utei u rangbah u dang phla ia katei ka jingleh kam sniew jong u haduh shisnem tam hadien ba u la dep pyniap klep ia katei ka kurim jong u.
Nalor kata, haba ki pulit ki tohkit ia u, u la kren thamula pynban ia ki pulit da kaba ong ioh lehse ka rieh hapoh khrum jingthiah.
Kumta, ka ïingbishar ha kane ka por katba kam pat lah ban shim ia ka rai ba khatduh haba iadei bad ka jait jing pynshitom ka ban pynngat ia u, ka la aiti ia u ha kti ki pulit bad un dang hap ban shong beit shwa hapoh patok tad haduh ban da ioh ia ka rai ba khatduh na ka ïingbishar.
