Kolkata, ïaïong:
Ka Calcutta High Court ka la hukum ba la dei ban don da ka jingtohkit ka Central Bureau of Investigation (CBI) ha kaba ïadei bad ka jingthung kam ïa ki nonghikai da ki heh jong ka Gorkhaland Territorial Administration (GTA) ha ki thaiñ ri lum jong ka West Bengal, la ïathuh ka tyllong khubor.
Ka ïingbishar ka la pdiang ïa ka hukum hadien ba ka la don ka shithi kaba la pynpaw halor ka jingdon jong ka jingdkoh treikam ha kaba ïadei bad ka jingthungkam ïa ki nonghikai ha ka thaiñ. Ka High Court ka la bthah ïa ka CBI ba kan phah ïa ka kaiphot ha kaba ïadei bad ka shithi hapoh 15 sngi.
Hashwa kane, ka ïingbishar ka la hukum ïa ka kynhun CID ba kan pynlong ïa ka jingtohkit ha kaba ïadei bad kane ka jingjia.
Ha kaba ïadei bad kane ka jingjia, kam pat don kano kano ka jingbuh jingujor.
Kane ka jingjia kaba thymmai ka la paw pyrthei ha ka por ba la sakhi ba ka la don ka jingpyndkoh treikam ha kaba ïadei bad ka jingthung-kam ïa ki nonghikai Primary bad Upper Primary.
U Myntri barim jong ka tnat pule-puthi jong ka jylla u Partha Chatterjee, u Presient barim jong ka Primary Education Board bad u MLA jong ka seng Trinamool Congress u Manik Bhattacharya ki la long napdeng kiba bun ki briew kiba la shahkem haduh mynta halor ka jingshah pynshisha ba ki la donkti ha ka kam bamsap kaba la mih na kane ka jingthung kam ïa ki nonghikai.
U Partha bad ka nongïarap ba ïajan jong u ka Arpita Mukherjee ki la shahkem ha ki jingjia hadien ba la ïoh ban kurup ïa ka pisa kaba bun kaba la kot sha ka `50 klur hadien ba la pynlong ïa ka jingleit khynra ha ki ar tylli ki ïing. Kine baroh ar ngut mynta ki dang don ha kti jong ka aiñ.
