Shillong, Ïaïong 10
U nongaiktien ka Voice of the People Party (VPP), Dr. Batskhem Myrboh ha ka Sngi Balang u la ong ba ka National People’s Party (NPP) ka don hapdeng ka jingkut lad bad ha ka jaka ba kan ïakhun bad ka seng, ki ïaleh thma pynban bad u paidbah.
“Ka NPP ka la kut lad. Ha ka jaka ban pynlong ïa ka jingïakhun bad ka VPP, kine pat ki leh thma bad u paidbah. Kane ka dei ka ‘non-issue’ bad kaba khlem nongrim,” la ong u Dr. Myrboh.
U Dr. Myrboh u la ong ïa kane haba pynshai halor ki jingjia ba dang shen kiba la kynnoh pyrshah ïa ka seng.
Ha kajuh ka por, u la pynshai ba ka seng kam don jingtip eiei halor kitei ki jingjia, bad kam ju phah hi ruh ïano-ïano ban leit pyrta ha kano-kano ka jingïalang.
“Ngim ju phah leit pyrta bad ngim ju hikai hi ruh ïa ki paidbah ban leh kumta. Kim dei ki dkhot jong ka VPP,” la ong u Dr. Myrboh halor ka jingjia ba dang shen ha Umsning, Ri-Bhoi.
U la ong ruh ban shu kynnoh ïa 1-2 ngut tang ba ki shu pyrta ïa ka shap jong ka seng, ka long ka bym don nongrim bad kumba ka long, katei ka dei ka jaka paidbah, bad ym ka jaka shimet.
“Lehse nangne shakhmat kin ong hi, kin sa phah pyrta hi, hynrei ban kynnoh pat ïa ngi, ka long kaba bakla namar ngim ju bthah ban leh kumta, pynban ngi hikai ïa ki paidbah ïa ka burom ka akor,” la ong u nongaiktien.
Halor ka jingpyrta ïa ka shap jong kano-kano ka seng, u Dr. Myrboh u la ïathuh ba katkum ka jingbatai ki ‘riewrim, kane ka ju jia naduh mynshuwa, shuwa ban long ka ilekshon.
U la ong ruh ba ka jingpynlong ishu ïa katei ka mat ka pyni ïa ka jingduna ha ka kyrdan jingheh-jingsan.
“Ki wan pyrta hynrei ki khlem pynkulmar, ki shu pyrta. Ban ong pat ba phah ka VPP, ym lah pdiang ïa ki jingkynnoh ba khlem nongrim,” u la ong.
Halor ka jingpan jingpynshai u Returning Officer (RO) ka Shillong Parliamentary konstitwensi, u S.C. Sadhu ha ka 9 tarik Ïaïong na u President ka VPP, u Bah Ardent Miller Basaïawmoit halor ka jingujor ba ha ka miet 8 tarik Ïaïong katba dang ïaid ka jingïalang ïalap ilekshon jong ka NPP ha Jaïaw, ki la don ki briew ïa kiba la kynnoh ba ki dei ki nongkyrshan ka VPP ki la wan ban pynthut ïa ka jingïalang, na ka liang u nongaiktien, u la ong ba ka seng kan sa pynshai sha u RO lyngba ka jingthoh ka ban sa phah lashai ka sngi halor kane ka bynta.
U Sadhu u la ai por ïa u Bah Ardent haduh ka 12 tarik Ïaïong ba un ai jubab ba balei ym dei ban leh eiei pyrshah ïa u hapoh ki kyndon jong ka Model Code of Conduct (MCC) namar katei ka jingjia ha Jaïaw.
