Shillong, Ïaïong 10
U MLA ka Voice of the People Party (VPP) napoh ka North Shillong, Bah Adelbert Nongrum, u la ong ba um ngeit ba kan don shisha kata ka jingpynkulmar kaba dang shen kaba la jia ha Jaïaw ha ka por ba la pynlong jingïalang da ka seng National People’s Party (NPP) kumba la kynnoh da ki nongïalam ka NPP ba ki dei ki nongkyrshan ka VPP kiba la thaw jingkulmar ha katei ka sngi namar kane ka dei ka kam saiñ pyrthei bad kaba kiwei ki ju ngeit ba ka dei ka kam saiñ pyrthei kaba jaboh.
Haba kren sha ki lad pathai ha ka Sngi Balang, u la ong ba ka VPP hi ka ngeit beit ha kata ka “Clean Politics” lane ha kata ka synshar-khadar kaba khuid bad kum ka seng kam ju pynshlur ne hikai ïa ki nongkyrshan jong ka ba kin leh ïa ki kam ki bym dei.
U Bah Adelbert u la pynrem jur ruh halor ka jingjia leit pynthut ïa ka jingïalang leit ïalap ilekshon kaba la pynlong da ka seng NPP ha Jaïaw, bad u la kyntu ruh ïa ki nongkyrshan jong ka VPP ba kim dei ban leit pynthut ne pynkulmar ïa ka jingïalang jong kiwei pat ki seng saiñ pyrthei.
“Kum kine ki jingjia kim dei ban don ha kano-kano ka liang jong ka seng ban pynthut ïa kawei pat ka seng kaba dang ïaid ban pynlong ïa ka jingïalap ilekshon”, la ong u Bah Adelbert.
U la pynshai ruh ba ha ka kam saiñ hima-sima ki ju don beit ki jingjia bapher-bapher hynrei ym tip pat la ka don ne em ka jingshisha ba kiwei ki seng ki la kynnoh pyrshah ïa ka VPP.
“Mynta ka lah ban long ba kiwei-kiwei ki paidbah kiba kyrshan ïa kiwei ki seng ki lah ban pyrta kumjuh ha ka jingïalang kaba ngi pynlong ma ngi ka VPP, hynrei ngim lah ban ong ne pynshisha pat ba ki dei ki briew jong kiwei pat ki seng”, la bynrap u Bah Adelbert.
Namar kata, u Bah Adelbert u la kyntu ruh ïa ki nongkyrshan ka VPP ba ha kum kane ka por ilekshon kim dei ban leh shongshit hynrei ki dei ban long kiba shitrhem bad ba kin ri ïa la ka akor ka burom. U la ong ba ki paidbah nongkyrshan ka VPP ki dei ban long kiba jai-jai namar kaba kham khraw ban pynpaw ïa ka jingpyrshah ïa kita kiba kynnoh kan dei ha ka 19 tarik u Ïaïong 2024 kaba dei ka sngi thep ‘vote’ na ka bynta ka ilekshon MP shapoh ka ïingdorbar Lok Sabha. U la ong ruh ba kiba kynnoh hi ïa ka VPP ki dei kiba la kut lad kut lynti namar kim donkam shuh ban leh da kumno-kumno ruh.
“Kine kiba kynnoh hi im-im peit-peit ïa ngi kum ka VPP, nga ong ba ka dei ka jingleh kaba la leh da ka jingkut lad kut lynti kaba ki ïohi ba ym don lad shuh da kumwei pat”, la bynrap u Bah Adelbert. Shuh shuh u Bah Adelbert u la ong ba ki paidbah ki la dap da ka jingdom bad ka jingbitar ban ïohi na kawei ka sorkar sha kawei pat ka sorkar kaba bat ïa u lakam synshar, hynrei ki khlem don kino-kino ki dak jingkyrmen. U la ong ba lehse, kine ki paidbah ki sngewthuh ba dei sa tang ha ka kti jong ka VPP kaba lah ban wanrah ïa ki jingkylla hapoh kane ka jylla.
