Shillong, Ïaïong 10
Ar ngut ki briew ki la duh ei noh ïa la ka jingim katba uwei pat u la lait im hadien ba ka trok kaba kit dohkha ka la kylla khram hapdeng surokbah ha Mawblei, Shillong.
Kane ka jingjia jong ka jingkylla katei ka trok 14 shaka kaba don ïa u nombor AP16-TS-9689, ka la jia ha ka por mynstep jong ka Sngi Balang hajan jong ka dukan die kali ne ka Hyundai Showroom.
Katkum ka khubor kaba la ïoh lum la ong ba ha kane ka trok la don lai ngut ki briew ba kynthup ïa u nongñiah. Ha ka por ba ka kylla ar ngut ki briew ki la khlad noh ha shen hadien ba ki la shah ban ha ka trok, katba u nongñiah pat u la shu mynsaw malu-mala, hynrei na ka liang ki pulit ki la pynkit noh sha ka jaka ai jingsumar ban pynthikna ba kan nym dei ka jingmynsaw ka ban ktah pat ïa ka koit ka khiah.
Katkum ka jingtip la ong ba kane ka trok ka dei kaba dang wan na Jowai, hynrei ynda poi ha Mawblei pat ka la kylla noh. La don kiba ong ba imat ka lah ban dei namar ka jingpynher, hynrei la ïoh jingtip ba ka jingkylla ka dei namar ka jingbym treikam ka ‘brake’.
La ïoh jingtip ba ar ngut kiba la khlad ha shen ki dei ki nongbud jong kane ka trok. Ka jingïap jong kine ka long ba ki la pyrshang ban kynthih nalor ka trok kaba dang ïaid shuwa ba kan kylla. Ïa ka metïap jong kitei ngut ki pulit ki la pynkit noh sha Civil Hospital, Shillong na ka bynta ban pyndep ïa kaba donkam.
