Shillong, Ïaïong 10
Ka prokram wad khynnah ïalehkai ba kynsai lane ka Talent Identification Pro -gram balai sngi kaba hap hapoh ka Khelo India Rising Talent Hunt (KIRTI-MyBharat) ka la poi sha kaba kut ha ka Sngi Balang ha Sports Authority India (SAI) Training Centre, Shillong.
Haduh kaba kut jong kine lai sngi ki la don haduh 1,006 ngut ki khynnah kiba la wan sha kane ka prokram ban shim bynta ha lai tylli ki jingïa-lehkai kiba kynthup ïa ka Athletics, Boxing bad ka Football.
Ha ka jingïalehkai Athletics ki la don haduh 249, Boxing ki don 146 ngut bad ha ka Football ki la don haduh 611 ngut.
Kumba ka paw kitei ki khynnah ki la ïoh ban ïashim bynta shitrhem ha kitei ki jingïalehkai hapoh ka jingkhmih ki coach jong ka SAI na ka bynta ban ithuh ïa ki sap ïalehkai ba kyrpang jong ki khnang ba ki lah ban shah khot ban ïoh ka jingshah hikai kaba paka ha ki shlem ai jinghikai kiba don ha kylleng jong ka ri India.
Ka jingthmu jong ka tnat ïalehkai jong ka Sorkar Pdeng ka long ban ithuh ïa ki sap ba kyrpang jong ki khynnah bad ban ai jinghikai pura ïa ki lyngba ka jingdon ïa ki jaka ïalehkai kiba paka namar ka jingangnud hi ka long ban sei ïa ki khynnah ïalehkai ki ban paw haduh ki lympung ïalehkai shabar ri kum ka Olympic bad kiwei.
Lah ban pynkynmaw ba ha ka sngi kaba nyngkong ki la don haduh 527 ngut ki khynnah (Athletics 141 ngut, Boxing 55 ngut bad Football 331 ngut). Ha ka sngi kaba ar ki la don 204 ngut (Athletics 37 ngut, Boxing 17 ngut & Football 150 ngut). Katba ha ka sngi kaba khatduh ki la don 130 ngut ki khynnah (Athletics 71 ngut, Boxing 74 ngut bad Football 130 ngut).
