Shillong, Ïaïong:
Ka Hynñiewtrep Integrated Territorial Organisation (HITO) Sengkmie hapoh ka jingïalam u President, Bah Donbok Dkhar, ha ka Sngi Ba-ar jong ka taïew ka 9 tarik Ïaïong 2024 ka la leit ban ïakynduh ïa u Chief Executive Member (CEM) ka KHADC, u Bah Pynïaid Sing Syiem bad ban aiti ruh ha u ïa ka dorkhas halor ka jingdon jong ki bar jylla ki bym ju wad jingtip shaphang ka ‘Trading License’ kiba shong ba sah hapoh ka Ri Khasi baroh kawei.
Haba kren sha ki lad pathai khubor hadien ka jingwan ïakynduh ïa u CEM ka KHADC, u Bah Donbok u la pyntip ba kum ka seng ka la dep ban pynlong ïa ka jingkhynra na ka bynta ban peit ïa ki briew kiba dei ki bar jylla kiba shong ba sah hapoh u pud u sam jong ka Ri Khasi la ki don ne em ïa ki kot ki sla kiba biang kiba kynthup naduh ki Labour License bad ki Trading License.
Ha kajuh ka por, na ka liang ka HITO ka la kyntu ruh ïa u CEM ka KHADC ba un shimkha ban pynlong ïa ka jingjurip bad talasi ha kaba ïadei bad ki nongñiah kali kiba dei ki bar jylla kiba don hapoh ka Ri Khasi ba ki dei ban pynrung kyrteng hapoh ki seng bapher-bapher, nangta ïa ki kali ba ki ñiah ruh kiba dei napoh ka jylla Meghalaya ki dei ban da ïoh ïa ka Labour License napoh ka Council, ki trai kali ki dei ruh ban ïoh ïa ka No Objection Certificate (NOC) napoh ka Council ha ryngkat ka jingpynshisha na ki pulit ne ka ‘Police Verification’ bad ruh kiba buh ïa ki shnat treikam ban leit jingleit ne ki ‘Tour Agency’ kiba long trai da ki bar jylla ki dei ban ïoh ïa ka NOC na ka Council namar ki don bun ki riew shim kabu kiba buh ïa ki ‘Agency’ khlem ki kot ki sla kiba biang.
“Ka khubor jong ngi na ka liang ka seng ïa ki barjylla ka long ba haba phi wan khaïi shapoh ka jylla jong ngi, ngi pdiang ïaphi hynrei phi dei ban pynbiang ki kot ki sla kiba biang bad da kynmaw ruh ba ka Ri Khasi kam dei ka tamasa ïalehkmen ba phin shu wan rung katba mon bad ba phin kamai katba mon hynrei kane ka dei ka jylla jong ngi, na ka liang jong ngi ha ryngkat ka jingïatreilang bad ka KHADC, ngin kyndang ha kano-kano ka por lada phi wan khaïi beaiñ hapoh kane ka jylla baieid jong ngi”, la ong u Bah Donbok.
Na ka liang u President ka HITO Shillong City, u samla Banpyntngenlang Syiemlieh, u la ong ba ha ka Ri Khasi hi ki ‘Touring Agency’ ba la seng da ki bar jylla ki la nang kharoi bad lyngba ka jingbun jong kine ki shnat treikam ki bym don ïa ki kot ki sla kiba biang bad kiba khlem ïaid ruh lyngba katkum ki kyndon jong ka aiñ ka KHADC ka la pynlong ïa ki nongniah kali kamai napoh ka jylla ba kin jynjar bad duh kamai namar ïa ki nongwan jngohkai la shu shim beit da kine ki ‘Agency’ kiba khlem ki kot ki sla kiba biang.
Shuh shuh u samla Banpyntngen u la ïathuh ruh ba katkum ki jingtip bad ki jingwad bniah la antad ba ki don haduh 10 tylli kine ki Agency hynrei kiba la lap hi da ka seng pat ki don haduh 5 ne 6 tylli bad ka seng ka la pyntip ruh ba lada kine ki shnat treikam kim lah ban pynbiang ïa ki kot ki sla, kum ka seng kam banse ban phah khang shisyndon ïa kine ki ‘Agency’.
Na ka liang ki nongïalam ka HITO ki la pyntip ruh ba u CEM u la ai ka jingkular ba un sa shimkhia ha kaba ïadei bad kane ka bynta bad u la bthah ruh ïa ki ba kin pynpoi ïa ki kyrteng jong ki nongñiah kali bad ki ‘Agency’ ki bym don ïa ki kot ki sla kiba biang.
