Shillong, Ïaïong 10
Ki bor pynïaid ilekshon ha kane ka Jylla ki la peit thuh bha ïa ka jinglong jingman jong ka shongsuk shongsaiñ ha kane ka Jylla khnang ba ka jingpynlong ïa ka ilekshon kan long kaba jai-jai bad kaba ïaid beit ïaid ryntih ha baroh ar tylli ki Lok Sabha konstitwensi ha kane ka Jylla.
Haba ïakren bad u Chief Electoral Officer (CEO) ka Jylla, u Dr BDR Tiwari ha ka Sngi Balang u la ong ba ki pulit bad ki bor district kiba dei ban peit lang ïa ka jingpynlong ïa ka ilekshon ki peit thuh bha ïa ka jinglong-jingman bad kumjuh ruh ïa ki jingjia kiba jia. U la ong ba ki bor pahara ki leh la ka jong ka bynta ban pyntikna ba ka ilekshon kan long kaba ïaid beit katkum ba la buh da ka Election Commission bad ka jingpynbiang ïa ki bor pahara lyngba ka Ministry of Home Affairs.
Haba ïadei bad ka jingïoh ka Jylla ïa ki pulit pahara Central Armed Police Force (CAPF) na ka bynta kane ka ilekshon, u CEO u la ïathuh ba ki pulit pahara na ka bynta ka Shillong Lok Sabha konstitwensi ki long 22 pyrton katba na bynta ka Tura Lok Sabha konstitwensi ki long 18 pyrton.
U CEO u la ong ba ki pulit ki la leh ïa kaba donkam ban pyntikna ba ka ilekshon kan long kaba ïaid beit bad kaba suk kaba saiñ ha kaba ki pulit pahara la phah da ka MHA lyngba ka ECI.
Kumba 22 pyrton ki pulit Central Armed Police Force (CAPF) kin pahara ha kylleng ki jaka thep ‘vote’ ha Shillong Parliamentary konstitwensi bad 18 pyrton yn pahara ha Tura Lok Sabha konstitwensi.
Baroh ki jaka thep ‘vote’ ki don 3,512 tylli. Na kine, 2,288 tylli ki jaka thep ‘vote’ ki dei kiba don ha Shillong Parliamentary konstitwensi bad 1,224 tylli ki jaka thep ‘vote’ ki don ha Tura Lok Sabha konstitwensi.
U CEO u la ong ba ki pulit CAPF ki la nang poi sha kane ka Jylla bad la nang phah sha ki jaka ba dei ban leit leh ïa ka kamram ban pahara ha ki jaka thep ‘vote’ kiba don ha kylleng ka Jylla.
