Shillong, Ïaïong 10
Ha ryngkat ka thong treikam ban teh song ïa la ka tynrai da ka jingïeid bad jingïatylli hapdeng ki khun samla, ka Raid Nongbri jong ka Hima Khyrim ka la plie ïa ka lympung ïalehkai phutbol ba la tip kum ka 1st Inter Raid Nongbri Knockout Football Tour -nament 2024 ha ka 5 tarik mynta u bnai ha Thynroit.
Ïa kane ka lympung la wan ban plie da u Syiem ka Hima Khyrim, u Dr. Balajied Sing Syiem ha ryngkat ka jingïadonlang u Bah K. Lyngdoh Nong-bri, Lyngdoh ka Raid Nongbri. Kiwei pat kiba la ïa donlang ki kynthup ïa u Myntri Kharum-nuid, u Myntri Nongrum bad u Myntri Swer nalor u Bah Dengbok Kurkalang, Secretary ka Raid, ki nongïalam shnong na ki shnong ba hap ha katei ka Raid.
Ha kane ka sngi, la pynlong ruh ïa ka jingïakob March Pass shwa ban sdang ka jingïalehkai kaba nyngkong jong ka phutbol ha kaba la ïashim bynta da 9 tylli ki skul ha ka thaiñ Thynroit.
Ïa ka nam lahduh na ka jingïakob March Pass na ka liang ki Senior, la rah da ka Shining Adventist Secondary School, katba ha ka liang ki Junior la rah da ka Thynroit Government LP School.
Ha kane ka lympung ki don baroh 16 tylli ki kynhun ki ban ïaknieh ïa ka song pisa ba T.30,000 kum ka lahduh bad T.15,000 ïa kaba wan ba-ar.
Ki kynhun kiba la ïa aireng ha ka sngi plie ïa ka lympung ki long ka Umphrup Sports Club A pyrshah ïa ka Thynroit Sports Club A, ha kaba ka Umphrup Sports Club A ka la jop da 2-0 kol.
Ha kane ka lympung ïa kaba yn pynkut ha une u bnai kin don ruh ki jingïakob ïalehkai phutbol hapdeng ki kynthei.
