Patna, ïaïong:
Ka seng Rashtriya Janata Dal (RJD) ha ka janmiet jong ka Sngi Ba-ar ka la pyllait paidbah ïa ka thup kyrteng jong 22 ngut ki kyrtong, kynthup ïa ar ngut ki khun kynthei jong u President ka seng u Lalu Prasad, na ka bynta ban ïakhun ïa ka ilekshon Lok Sabha ha Bihar. Ïa ka ilekshon la thmu ban pynlong ha ki 7 tylli ki bynta ha ka jylla bad ka bynta kaba nyngkong jong ka jingthep vote kan sa long ha ka 19 tarik, Ïaïong.
Ki ar ngut ki khun jong u Lalu ki long ka Misa Bharti bad ka Rohini Acharya. Kine ki la shah pynbna kyrteng ban ïakhun na Patliputra bad na Saran Lok Sabha konstitwensi. Ka Rohini, kaba la kham paw pyrthei ha ki lad phah khubor, ka la nang paw bad ïoh jingïaroh hadien ba ka la dep ban ai uwei u khyllai na ka bynta u kpa jong ka uba la shitom.
Ka la ïohlad ban mih ha ka rynsan jong ka saiñ pyrthei na ka bynta ban ïakhun ïa ka ilekshon na Saran ka konstitwensi ha kaba u Lalu hashwa u la shahjied sha Lok Sabha. Ka Misa, kaba dei ka dkhot jong ka Rajya Sabha, kam shym la jop ha ka jingïakhun ïa ka ilekshon Parliamentary Elections na Patliputra la arsien. Ka la shahrem noh ha u Myntri barim jong ka sorkar kmie u Ram Kripal Yadav.
Katba ka Misa ka la ïakhun pyrshah ïa u Ram Kripal sa shisien na Patliputra, ka Rohini pat ka la ïakhun pyrshah ïa u Myntri barim jong ka sorkar kmie bad u MP ba mynta jong ka seng BJP u Rajiv Pratap Rudy na Saran. Ka seng ka la ai tiket sha ka Bima Bharti na Purnea. U runar ïa uba la kylla long u riewsaiñ pyrthei u Vijay Kumar Shukla ïa uba la tip ruh da ka kyrteng kum u Munna Shukla, ha kaba ka kyrteng jong u ka la paw pyrthei halor ka jingshah kynnoh ba u la pynïap ïa u Myntri barim u Brij Bihari Prasad, u la shah pynïakhun na Vaishali. Une un ïakhun pyrshah ïa ka kyrtong jong ka seng LJP (Ram Vilas) ka Veena Devi.
U Shahnawaz Alam u la shah pynïakhun na Araria katba ka Ritu Jaiswal kan sa ïakhun na Sheohar. U Kumar Sarvajeet u la shah pynïakhun na Gaya, u Shravan Kushwaha na Nawada, u Archana Ravidas na Jamui bad u Abhay Kumar Kushwaha na Aurangabad. Baroh saw tylli ki konstitwensi, kiba kynthup ïa ka Jamui, Nawada, Aurangabad bad Gaya kin sa pynlong ïa ka jingthep vote ha ka bynta kaba nyngkong ha ka 19 tarik, Ïaïong.
U Jai Prakash Yadav un sa long u kyrtong jong ka seng na Banka , u Lalit Yadav na Darbhanga, u Sudhakar Singh na Buxar, u Chandrahas Chaupal na Supaul, u Shivchandra Ram na Hajipur, u Surendra Prasad na Jehanabad, ka Anita Devi Mahto na Munger bad u Alok Kumar Mehta na Ujiarpur konstitwensi. Kumjuh u Arun Rai u la shah pynïakhun na Sitamarhi, u Md. AA Fatmi na Madhubani, u Dipak Yadav na Valmikinagar bad u Prof. Kumar Chandradip na Madhepura konstitwensi. Kumba la ïathuh, la ong ba ka seng RJD kan sa ïakhun ha ki 23 tylli ki konstitwensi.
